‘¡Espoxiga!’, el cantar de Pop Piquiñín pal VI Día de la Reciella, yá tien videoclip

‘Reciella. Families pol Asturianu’ ta acabante d’espublizar el videoclip de ‘¡Espoxiga!’, el cantar de Pop Piquiñín pa promocionar el VI Día de la Reciella. Pablo A. Quiroga ye’l realizador del videu, grabáu nel Xardín Botánicu Atlánticu y nel que los neñes y neños son protagonistes.

Mar Álvarez ye la imaxe de Pop Piquiñín nesti trabayu que xuega cola lletra del cantar y na que, na so parte final, tamién participen dalgunos de los padres de Reciella. Juan Tizón encargóse de la edición de color, efectos y dellos visuales del videu d’un cantar que tomar’l relevu de ‘Entaína’ (Skama la Rede) y ‘N’asturianu sumes’ (David Varela).

Al igual que nesos dos cantares, David Guardado encargóse de la lletra. Nesta ocasión “fala de la importancia de la tresmisión xeneracional; de qu’al igual qu’a les plantes y tolos seres vivos, hai que cuidalos y falalos pa permitir el so espoxigue”, esplicó l’autor en xunu cuando Asturies.com espublizó la versión karaoke de '¡Espoxiga!' na so estaya infantil ‘A la gueta los suaños’.

Nel Muséu del Pueblu d’Asturies

El VI Día de la Reciella, xornada de diversión n’asturianu en familia, va celebrase’l domingu 7 d’ochobre nel Muséu del Pueblu d’Asturies. Esti eventu gratuitu y abiertu qu’axunta a miles de personses lleva celebrándose dende l’añu 2012 en Xixón con una programación compuesta por talleres, xuegos, conciertos y, dende 2016, por ‘Entaína’, la carrera de relevos ente güelos, padres, fíos y nietos que simboliza la tresmisión xeneracional del idioma.