Pop Piquiñín interpreta ‘¡Espoxiga!’, el cantar del VI Día de la Reciella

Cartelu VI Día de la Reciella

El 7 d’ochobre va celebrase'l VI Día de la Reciella. Nesta ocasión el lema del eventu ye ‘¡Espoxiga!’, nome tamién del cantar que promociona esta xornada de diversión n’asturianu en familia, qu’interpreta Pop Piquiñín, Petit Pop cantando n'asturianu, y qu’Asturies.com ufre güei en versión karaoke.

Ésti ye’l tercer añu nel que ‘Reciella. Families pol Asturianu’ apuesta por ellaborar un tema pa fomentar l’usu de la llingua asturiana, sirvir de material de trabayu na escuela y, al empar, promover la participación nesta cita que tien como sede’l Muséu del Pueblu d’Asturies el primer domingu d'ochobre. Primero foi Skama la Rede con ‘Entaína’, llueu David Varela con ‘N’asturianu, sumes’ y agora Pop Piquiñín con ‘¡Espoxiga!’, que pronto va contar con un videu realizáu por Pablo A. Quiroga y que dende l'asociación de families esperen que seya "ún de los temes del branu".

Al igual que nes composiciones anteriores, la lletra del cantar ye de David Guardado. “El tema fala de la importancia de la tresmisión xeneracional; de qu’al igual qu’a les plantes y tolos seres vivos, hai que cuidalos y falalos pa permitir el so espoxigue”, esplica l’autor de la lletra sobre esta pieza que yá pues deprender y practicar gracies a la versión karaoke editada por Asturies.com pa ‘A la Gueta los Sueños’.

Entaína

El VI Día de la Reciella trátase d’una xornada pa vivir en familia onde la llingua asturiana ye protagonista. Talleres, xuegos y conciertos componen un programa completu nel que tien un protagonismu especial ‘Entaína’, la carrera de relevos ente güelos, padres, fíos y nietos que simboliza la tresmisión xeneracional del idioma.