El dúu Muga y el Corín de Reciella ponen banda sonora al VII Día de la Reciella con ‘¡Préstame pola vida!’

El VII Día de la Reciella yá tien cantar. Depués de ‘Entaína’, ‘N’asturianu sumes’ y ‘¡Espoxiga!’ llega ‘¡Préstame pola vida’, tema interpretáu pol dúu Muga, formáu por Alicia Álvarez y David Guardado, y el Corín de la Reciella que nun va dexar de sonar el domingu nel Muséu del Pueblu d’Asturies.

La instalación museística xixonesa acueye per sétimu añu esta xornada d’ociu y convivencia en familia col asturianu como llingua vehicular entamada por ‘Reciella. Families pol Asturianu’ col oxetivu de promover la tresmisión xeneracional del idioma. Asina entámase la carrera Entaína, que vive la so cuarta edición y simboliza la entrega del relevu de la llingua de padres y güelos a nietos y fíos, actividá que va abrir les actividaes a les 11.30 hores y que yá tien la inscripción abierta –va poder facese in situ a partir de les 11 hores–.

Dende esa primer edición de la prueba deportiva pa toles edaes, grupos y artistes asturianos vienen collaborando poniendo la música a lletres de Guardado, que nesta ocasión aporta la voz a un testu d’Alicia Álvarez. Primero foi Skama la Rede, con ‘Entaína’, pa siguir David Varela con ‘N’asturianu sumes’ y, yá l’añu pasáu, Pop Piquiñín con ‘¡Espoxiga!’.

Siguiendo’l lema del Día de la Reciella d’esti añu, ‘N’asturianu ¡presta pola vida!’, el cantar pal 2019 ye ‘¡Préstame pola vida!’, interpretáu por Muga y el Corín de la Reciella, formáu por Carmen, Cecilia, Lena, Mael, María y Xana. Pedro Vigil encargóse de la grabación y Mar Álvarez aportó colos teclaos y con coros.

Según esplica Reciella, “la lletra fai referencia a les llingües tanto como elementu de comunicación a traviés de les que se pue espresar cualquier tipu d’esperiencia, como a la emoción y el sentimientu de pertenencia que lleven arreyaes, especialmente si falamos del so usu en familia”. El tema vien acompañáu d’un videoclip, rodáu recién nel propiu Pueblu d’Asturies y en Candás por Pablo A. Quiroga, con post-producción dixital de Juan Tizón, nel que participaron, amás de los intérpretes, families de Reciella.

Esti coleutivu anima a les neñes y neños asturianos, y a les sos families, “que vayan practicando’l cantar pa poder cantalu toes y toos xuntos el domingu 13 d’ochobre en Xixón en el VII Día de la Reciella”. Nesa xornada van poder disfrutar de baldre d’actividaes, talleres, conciertos y exhibiciones deportives dende les 11.30 a les 19 hores.