50 años de la llegada a la Lluna

Buelga d'Aldrin na lluna

El 20 de xunetu del 1969, los astronautes estauxunidenses Neil Alden Armstrong y Edwin Eugene Aldrin convirtiéronse nes primeres persones en llegar a la Lluna cuatro díes depués del despegue del Apolo 11 de Cabo Cañaveral. Un día depués dambos pisaben suelu llunar, fechu históricu del que se cumplen agora 50 años.

“It's one small step for [a] man, one giant leap for mankind (un pasu pequeñu pa un home, un gran saltu pa la humanidá)” foron les pallabres que citó Armstrong, el primeru en facelo, enantes de baxar del módulu. Yeren les 2.56 hores (hora internacional UTC) del día 21 y el mundu contemplábalo con espeutación dende los sos televisores.

Dende entós 10 astruonauta más tuvieron el privilexu de pisar la Lluna. L’últimu foi Gene Cernan nel 1972, cuando se dexaron les misiones tripulaes que la NASA quier recuperar nun plazu de cinco años cola intención de llevar a una muyer al satélite y llegar a una superficie del mesmu nunca vista.

En ‘A la gueta los suaños’ celebramos esta efeméride recuperando la ficha didáutica sobre la Lluna y otra sobre la conquista del espaciu. Amás, convidámoste a navegalu con una nave espacial nel xuegu A la gueta los planetes, col que vas poder poner el pie nel nuesu satélite.

Na semeya, buelga dexada por Aldrin na Lluna.