Noticies a La Gueta

CP Felechosa ‘P’allá del Más-Allá’

Los escolinos de quintu y sestu de Primaria del Colexu Públicu Felechosa, baxo la direición de la maestra Laura Prieto, comienza esti vienres la xira teatral con ‘P’allá del Más-Allá’. La obra recibió’l tercer premiu del VI Certame de Teatru Escolar en Llingua Asturiana y Gallego-asturiano, y el de meyor actriz, a Nerea Megido.

Cartelu cuentacuentos-taller 'Deva y el pitín' en Noreña

‘Deva y el pitín’ ye la historia que va protagonizar un cuentacuentos-taller que pon María Esther García López esti miércoles en Noreña. Ésti ta destináu a neñes y neños de más de 5 años y forma parte de la programación del conceyu pola Selmana de les Lletres Asturianes.

Los viaxes de Candela y d'Irina

El viaxe d'Irina escritu pola francesa allugada en Salinas Dominique Vernay ye treslladada a los escenarios por Olga Cuervo y David Varela. L’actriz y el músicu convierten esta historia nun cuentacuentos musical nesta actividá de La Reciella de la Factoría.

Casa del Agua

‘Nun dexar a naide atrás; agua pa toos’ ye’l lema del Día Mundial del Agua que se conmemora esti vienres, coincidiendo col 22 de marzu. Escolines y escolinos de Sobrescobiu y Casu conmemoraron esta xornada inaugurando la campaña pa un consumu responsable que va llegar escueles de tol país con visites a la Casa del Agua y a Baíña.

Ana Morán

L’Espaciu Escénicu de Factoría Cultural d’Avilés acueye esti vienres una cita nueva de La Reciella de La Factoría, el ciclu qu’entama la Estaya de la Llingua y ‘Reciella. Families pol Asturianu’. Ana Morán va poner el cuentacuentos ‘Nun quiero ser princesa’.

Cubierta 'Páxines del diariu de Simón' de Vicente García Oliva

L’Ayuntamientu de Noreña entama esti xueves un alcuentru del autor Vicente García Oliva colos llectores más mozos de Noreña. La Biblioteca Pública Municipal 'Alonso Marcos de Llanes' va acoyer esta actividá con motivu del Día Internacional de la Llingua Materna.