La final de la Olimpiada Escolar Urbano Rodríguez cambia al Arqueolóxicu

El miércoles 20 d'avientu va tener llugar n'Uviéu la final de la Olimpiada Escolar Urbano Rodríguez de l'Academia de la Llingua Asturiana (ALLA) cola novedá del Muséu Arqueolóxicu d'Asturies como sede. 17 escolines y escolinos de 9 centros educativos de Primaria y Secundaria y Bachilleratu pasaron el corte de la primer fase, na que participaron más de 150 estudiantes.

A les 10.30 hores de mañana los presentes van recibir el tema sobre'l qu'han escribir pa tratar de llevar la victoria nel concursu. Los finalistes de Primaria son Sonia Martínez y Wiam Ezzairi, del CP Maestro Casanova de Cangas del Narcea; Ana Menéndez y Lola Álvarez, del CP San Cloyo; y Eidur Riaño y María Montserrat Fernández, del Maurista Auseva d'Uviéu.

Mentes, clasificaron na categoría de Secundaria y Bachilleratu los escolinos Emma Varela y Xune Artime, del IES Candás; Aitana Carcedo y Gada Casielles, del IES Santa Bárbara de La Felguera; Martín Peña, del IES Cristo del Socorro de Lluanco; Jimena Canga y Xabela Titos, del IES Bernaldo de Quirós de Mieres; Román García y Tomás Moro, del IES Juan José Calvo Miguel de Sotrondio; y Candela Fernández y Mario Vergara, del IES Ramón Areces de Grau. Toos ellos van facer les sos redaiciones nel Muséu Arqueolóxicu d'Asturies al tar n'obres el llar social de l'ALLA.

Como premiu, amás, van poder facer una visita guiada pela instalación museística. Los ganadores van dase a conocer sobre les 13 hores nel salón d'actos.