noticia

Dende esti xueves y hasta’l día 20 ta abiertu’l plazu de matriculación nel cursu viniente en Primaria, nel que les escolines y escolinos han d’escoyer ente Llingua Asturiana y Lliteratura o Cultura Asturiana, en castellanu. La Conseyería d’Educación y Cultura caltién la campaña de promoción de la materia #YoApúntome, #EuApúntome nel casu del gallego-asturiano.

Los escolinos de quintu y sestu de Primaria del Colexu Públicu Felechosa, baxo la direición de la maestra Laura Prieto, comienza esti vienres la xira teatral con ‘P’allá del Más-Allá’. La obra recibió’l tercer premiu del VI Certame de Teatru Escolar en Llingua Asturiana y Gallego-asturiano, y el de meyor actriz, a Nerea Megido.

‘Deva y el pitín’ ye la historia que va protagonizar un cuentacuentos-taller que pon María Esther García López esti miércoles en Noreña. Ésti ta destináu a neñes y neños de más de 5 años y forma parte de la programación del conceyu pola Selmana de les Lletres Asturianes.

El viaxe d'Irina escritu pola francesa allugada en Salinas Dominique Vernay ye treslladada a los escenarios por Olga Cuervo y David Varela. L’actriz y el músicu convierten esta historia nun cuentacuentos musical nesta actividá de La Reciella de la Factoría.

L’Espaciu Escénicu de Factoría Cultural d’Avilés acueye esti vienres una cita nueva de La Reciella de La Factoría, el ciclu qu’entama la Estaya de la Llingua y ‘Reciella. Families pol Asturianu’. Ana Morán va poner el cuentacuentos ‘Nun quiero ser princesa’.

L’Ayuntamientu de Noreña entama esti xueves un alcuentru del autor Vicente García Oliva colos llectores más mozos de Noreña. La Biblioteca Pública Municipal 'Alonso Marcos de Llanes' va acoyer esta actividá con motivu del Día Internacional de la Llingua Materna.

Alicia Álvarez y David Varela van poner un conciertu n’acústicu con una esbilla de los cantares de ‘Bestiariu’, proyeutu qu’axunta a decenes de grupos asturianos con cantares con animales como filu conductor. Esta actividá va abir el primer semestre del ciclu La Reciella de La Factoría qu’aporta a Avilés teatru, música y cuentos.