Vázquez gana con ‘El sol na escombrera’ el so segundu Alfonso Iglesias de cómic

El XII Premiu Alfonso Iglesias de cómic, el primeru de los cinco que se falla, ye p'Alberto Vázquez García gracies al so trabayu ‘El sol na escombrera’. L’autor mierense suma asina’l so segundu gallardón tres l’algamáu nel añu 2017 con ‘Los llazos coloraos’.

‘El sol na escombrera’ rellata la vida de José Fernández Sánchez, un neñu asturianu de la guerra. La historia llevada al cómic por Vázquez convenció al xuráu pola calidá de “un estilu de dibuxu característicu y personal, yá afitáu”, pol “enfoque realista y la propuesta sobria”, y pola ellaboración tan brillante d’una obra “envuelta nun tonu de señardá qu’espeya a la perfección el de les alcordances del protagonista”.

Artista gráficu, dibuxante, curtiumetrista y documentalista, l’autor nacíu en Mieres nel 1969 yá llevara esti gallardón hai trés años con ‘Los llazos coloraos’, cómic que trata sobre’l procesu d’industralización del país, centrándose nos años que siguieron a la Guerra Civil. Tamién firmó los documentales ‘1962. La lluz que vieno del corazón’, ‘1965. Asaltu a la comisaría de Mieres’, '1934-1935. Diez asturianos nel exiliu francés’ o'l recién espublizáu 'Mines de Figareo. Memoria d'una llucha (1978-1980)' y asoleya tires cómiques en medios periodísticos asturianos.

L’Alfonso Iglesias, al igual que los cuatro Premios Lliterarios restantes, tienen anguaño una recompensa de 5.000 euros. El próximu en fallase va ser el Xuan María Acebal de poesía’l día 23.

Xunta del xuráu del Nel Amaro

Esta tarde, a les 17 hores, el direutor xeneral de Política Llingüística, Antón García, va presidir el xuráu del IV Premiu y Festival Nel Amaro de Teatru Profesional en Llingua Asturiana o Gallego-asturiano. Na mesma van seleicionase les obres finalistes que se van representar nel festival esta seronda.