Del Arco va sustituyir a Álvarez en Derechos Sociales y Bienestar

La conseyera nueva y Ana Vanessa Gutiérrez, al frente de Cultura, Política Llingüística y Deporte, van tomar posesión de los cargos el domingu.

L'hasta agora direutora xeneral d'Infancia y Familia, Marta del Arco, ye la persona escoyida pa xestionar la Conseyería de Derechos Sociales y Bienestar. "Ésta ye la nuesa apuesta pa que'l Gobierno d'unidá progresista y reformista siga avanzando”, espresó'l presidente Adrián Barbón al anunciar ayeri la so decisión, consensuada col so sociu Convocatoria por Asturies.

Del Arco (Salamanca, 1959) cumple col perfil de muyer independiente, progresista y conocedora del ámbitu social que se buscaba. Diplomada en Maxisteriu pola Universidá d'Uviéu y educadora social habilitada pol Colegio Profesional de Educadores Sociales de Cantabria, ye funcionaria de carrera de l'Alministración asturiana dende'l 1986.

"Conoz perfeutamente'l proyeutu de llexislatura, tien esperiencia de gobiernu, sabe lo que significa xestionar y tien tola mio confianza como presidente", dixo Barbón. El socialista va firmar mañana'l decretu de nomamientu de Del Arco y de Gutiérrez como conseyeres, pa tomar posesión de los cargos el domingu, xornada na que tamién van participar nel Conseyu de Gobiernu.

Movimientos pola marcha de Fernández Rodríguez a HUNOSA

La responsable nueva de Derechos Sociales y Bienestar sustitúi nel cargu a Melania Álvarez García, que va pasar a ser senadora por designación autónomica. La candasina va ocupar l'escañu d'Enrique Fernández Rodríguez, presidente nuevu d’HUNOSA.