Barbón rectifica: Cultura y Política Llingüística va tener conseyería propia ensin Derechos Sociales

La estructura nueva del Gobiernu va pasar a contar finalmente con 11 conseyeríes. Nel Plenu d’esti miércoles na Xunta Xeneral el presidente Adrián Barbón, nuna respuesta al popular Álvaro Queipo, anunció que, “recoyendo’l plantegamientu de les asociaciones culturales y del tercer sector”, Cultura, Política Llingüística y Deporte va tener conseyería propia y Derechos Sociales va siguir independiente.

Nun pasaran 48 hores de l’anuncia de la creación d’una Conseyería de Derechos Sociales, Cultura, Política Llingüística y Deporte con Ana Vanessa Gutiérrez al frente, y poco menos de 24 de la so xustificación en rueda de prensa apuntando principalmente al alcuerdu de gobiernu con Convocatoria por Asturies pol que se ponía’l tope en 10 conseyeríes. Un cambiu col que Queipo se mostró ayeri críticu, tanto pola xunión de toes eses materies nuna única conseyería como pola forma de comunicalo, asegurando al empar que nun criticaría la creación de dos conseyeríes pa elles.

Esta mañana’l popular sacaba de raspión el tema na so entruga al presidente sobre’l conflictu d’ITVASA –“los sos movimientos últimos dexáronnos ablucaos: un conseyeru que pasa a senador, un senador que se convierte en presidente d’HUNOSA, una conseyera que pasa a ocupar esi escañu na Cámara Alta, una viceconseyera que pasa ocupar una macroconseyería qu’amás axunta competencies tan miscibles como Derechos Sociales y Política Lingüística”–, lo que dio pie a Barbón a anunciar la so rectificación, ensin derechu a réplica. “Estos díes escuché atentamente a multitú de coleutivos y d’asociaciones del tercer sector y de la cultura, fixéronnos plantegamientos, falamos colos nuesos socios de gobiernu y amás inclusive los partíos de la oposición opinaron al respeuto. Vusté mesmo ayeri dixo que si yo plantegase la división d’estes conseyeríes anque fora creando una conseyería más nun diba tener la crítica del Partido Popular”, espresó.

“Ayeri dixi abiertamente”, siguió, “que la estructura de gobiernu y los nomes tán en permanente esame, porque a los que tienen que sirvir nun ye a esti presidente nin a esti Gobiernu de xunidá progresista y reformista, nin siquier a esta Cámara; a los que tienen que sirvir son a los ciudadanos y ciudadanes. Por eso, recoyendo’l plantegamientu de les asociaciones culturales y del tercer sector, depués de sentir a tol mundu, y dao que vustedes per una vez van abandonar la crítica, paez que quieren ser constructivos, anuncio a la Cámara qu’efeutivamente habrá dos conseyeríes, una más: Conseyería de Cultura, Política Llingüística y Deportes, que va ocupar Ana Vanessa Gutiérrez; y va haber una conseyera de Derechos Sociales y Bienestar”, ensin anunciar entovía’l nome al tar esti pendiente d’un diálogu nel senu del Gobiernu.