Valdés pretende dar un pasu atrás na normalización toponímica

El Conceyu de Valdés, gobernáu pol PSOE y cola toponimia normalizada dende’l 2014, pretende dar un pasu atrás nel procesu recuperando la derogada, la castellanizada, pa que conviva cola tradicional. Tendría'l preste del Gobiernu, pero namái pa la capital y posiblemente dalguna población concreta como podría ser el casu de Cadavéu, según anunció l’alcalde Óscar Pérez Suárez.

D’esta forma, Ḷḷuarca pasaría de ser el nome oficial únicu a convivir con Luarca nuna denominación billingüe ‘Ḷḷuarca/Luarca’ al igual que pasa con Xixón, Llangréu o Uviéu. Un pasu atrás nel procesu de normalización que lidera’l gobiernu municipal del PSOE y que cuenta col sofitu del restu de partíos con representación: Ciudadanos, PP, Foro y Avanza Valdés.

Iniciativa pol Asturianu amosó güei la so posición contraria a esti pasu atrás al entender que ye “un precedente mui negativu pa tol trabayu fechu hasta agora en materia de política llingüística, de recuperación y de normalización de los topónimos tradicionales”. “El Gobiernu d’Asturies, que tien la máxima responsabilidá y competencies como recueye la Llei d’Usu nesti asuntu, tien qu’evitar esti tipu de midíes” por dir “contra l’espíritu de la propia Llei”, esto ye, “recuperar la toponimia tradicional, nun escaecela y facer normal los nomes tradicionales de los pueblos”, afirma’l so presidente Iván Llera.

Asina, reclama “reflexón a la Conseyería y a la Dirección Xeneral de Política Llingüística”. “Ye sorprendente qu’esta midida de política llingüística, que ye la primera novedá respeuto al Gobiernu anterior, seya precisamente un pasu atrás”, llamenta.

Na semeya, Ḷḷuarca.