Valdés cuestiona la Llei d'Usu y pide la vuelta de los topónimos non tradicionales

PSOE, Ciudadanos, PP, Foro y Avanza Valdés presentaron una moción conxunta al Plenu pa solicitar al Gobiernu "la convivencia de la toponimia actual con la anterior al 2014".

Cinco años depués de que'l propiu Plenu aprobase l'espediente toponímicu propuestu pola Xunta Asesora de Toponimia, tres un primer preste y un periodu d'información pública pa la presentación d'alegaciones, Valdés pretende dar marcha atrás al procesu de recuperación de los nomes de llugar tradicionales incorporando los castellanizaos, yá derogaos. D'esta forma cuestiona la Llei d'Usu y Promoción del Bable/Asturianu, qu'afita que los topónimos del país "tendrán la denominación oficial na su forma tradicional", esto ye, l'asturiana, recoyendo la posibilidá d'adoptar una forma billingüe namái en casos esceicionales.

El pidimientu de tolos grupos municipales, incluyida la candidatura sofitada por Izquierda Xunida (IX), Podemos y EQUO, Avanza Valdés, ye'l de solicitar "al Consejo de Gobierno del Principado de Asturias que apruebe un decreto en el que se indique como nombres oficiales de los pueblos de Valdés el asturiano y el castellano, ejemplo de Cadaveu-Cadavedo, L.luarca-Luarca" (sic). Esta posibilidá que dexa de la norma establezse namái p'aquellos casos en que "un topónimu tenga usu xeneralizáu na so forma tradicional y en castellanu", pero nunca de forma xeneralizada, como pretenden dende'l Conceyu de Valdés.