Los topónimos La Foz y Muros modifíquense y Ḷḷuarca finalmente adopta la forma billingüe

El cambiu del topónimu de la cabeza de conceyu de Valdés pa convertilu en billingüe, pasando a ser Luarca/Ḷḷuarca en llugar de Ḷḷuarca, yá ye una realidá depués de la espublización nel BOPA de la modificación del decretu del 2014 que recuperaba los nomes de llugar tradicionales. Morcín y Muros tamién faen correiciones al propiu.

El pidimientu del Conceyu de Valdés tuvo lideráu pol gobiernu municipal del PSOE y contó col sofitu del restu de partíos con representación: Ciudadanos, PP, Foro y Avanza Valdés. Un retrocesu nidiu del procesu de recuperación de la toponimia tradicional al convertir en billingüe la forma asturiana que’l propiu Plenu del Ayuntamientu aprobó hai 7 años, dando prioridá agora a la castellana y asitiando Ḷḷuarca per detrás.

La Xunta Asesora de Toponimia aceptó’l pidimientu al dase les condiciones que marca la llei p’adoptar formes billingües, pero nun lo fixo con otros propuestos por Valdés, como Cadavéu. Asina, toles formes oficiales del conceyu van siguir siendo les tradicionales.

Iniciativa pol Asturianu, tres conocer la confirmación del cambiu, asoleyó un comunicáu nel que califica de "inadmisible que s’use la Llei d’Usu pa dar pasos atrás na normalización toponímica". "Usar les ferramientes llegales creaes pa normalizar la toponimia tradicional pa facer el camín contrariu, ye una trampa y un malísimu precedente", afirmó'l coleutivu, que considera que relegar la forma tradicional non sólo a compartir espaciu cola forma yá derogada, sinón a facelo en segundu llugar, va nel sen contrariu a lo establecío pola llei, convirtiendo a la forma tradicional "nun adornu".

"Ye obligación de la Conseyería de Cultura y Política Llingüística facer pedagoxía sobre la necesidá de recuperar les formes tradicionales y vixilar el cumplimientu efectivu", añadió.

Con apellíu

Les otres dos modificaciones aprobaes pol Conseyu de Gobiernu qu’entren güei a valir son les solicitaes por Morcín y por Muros. La Foz pasa a ser La Foz de Morcín, mentes que Muros recupera l’apellíu y pasa a ser Muros de Nalón.

Na imaxe, Ḷḷuarca. Semeya obra d'amaianos baxo llicencia CC BY 2.0.