Los topónimos tradicionales de los conceyos de Valdés y Santu Adrianu yá son oficiales

|

Tres la espublización nel BOPA del sábadu de los decretos toponímicos de Valdés y Santu Adrianu, los nomes de llugar tradicionales d’estos dos conceyos pasen a ser los oficiales. A diferencia d’otres poblaciones importantes, Ḷḷuarca tien namái denominación asturiana.

El 5 d’agostu pasáu’l Conseyu de Gobiernu aprobaba estos decretos, polo que namái quedaba’l trámite de la so espublización nel Boletín Oficial del Principáu d’Asturies (BOPA) pa que los topónimos tradicionales pasaren a ser los oficiales, derogando asina a los castellanos. Dende esti momentu, les diferentes alministraciones han d’adecuar de manera progresiva les rotulaciones, mapes y planos, y tán obligaes a utilizar les formes dende’l sábadu llegales: Cadavéu en cuenta Cadavedo y Outur en llugar d’Otur, nel casu de Valdés, y Castañeo’l Monte por Castañedo del Monte y Los Niseiros en sustitución de Los Niseros, en Santu Adrianu, por poner dellos exemplos.

Con Valdés y Santu Adrianu, yá son 53 los conceyos que recuperaron los nomes de llugar tradicionales, sumando asina 16.565 topónimos, según cifres del Gobiernu. Anguaño hai otros 12 que tienen abiertu’l so espediente d’oficialización topónimica, en distintes fases de tramitación. Éstos son Ayande, Cabrales, Caravia, Castropol, Ibias, Llanera, Uviéu, Peñamellera Alta, Salas, Somiedu, Tapia y Tinéu.

AdxuntuTamañu
PDF icon Valdés.pdf1.57 MB
PDF icon Santu Adrianu.pdf370.83 KB
Contador Estadistiques