La XDLA demanda a Cultura “nengún pasu atrás col procesu de recuperación de los nomes tradicionales” d’Asturies

El pidimientu del Conceyu de Valdés de recuperar la toponimia non tradicional, la castellanizada, derogada nel 2014, indigna a la XDLA. Pide intervenir a les direiciones nacionales del PSOE, IX y Podemos y demanda a Cultura “nengún pasu atrás col procesu de recuperación de los nomes tradicionales de los llugares d’Asturies”.

“Agora, de repente, danse cuenta de que tienen que cumplir la llegalidá usando ‘Ḷḷuarca’ y nun-yos gusta”, critica’l coleutivu cívicu, que recuerda que los topónimos tradicionales de Valdés son los oficiales porque’l propiu Conceyu aprobólos en Plenu. Unos nome de llugar, que sicasí, “nun usaron nunca” nin tampoco comunicaron al Instituto Nacional de Estadística (INE) “como se pue ver si se comprueba'l nomenclátor”, incumpliendo asina la llexislación vixente.

“La situación manca más cuando vemos que partíos como'l PSOE o Avanza Valdés –marca local de Podemos y IX– apoyen esta midida, cuando a nivel autonómicu apoyen la oficialidá y la recuperación del nuestru patrimoniu llingüísticu. ¿Ésta ye la primer midida del alcuerdu en favor de la toponimia del que falaben PSOE y IX nel alcuerdu d'investidura que fixo a Adrián Barbón presidente d'Asturies? ¿Nun van dicir nada dende les direiciones de la FSA, Podemos Asturies y IX sobre lo que quieren facer los sos partíos en Valdés?”, entrúgase la Xunta pola Defensa de la Llingua Asturiana (XDLA).

Sobre la moción presentada, que busca la doble denominación en tolos topónimos, una opción que dexa abierta la Llei d’Usu y Promoción del Bable/Asturianu namái pa casos esceicionales, como se fixo con ‘Oviedo/Uviéu’ o ‘Gijón/Xixón’ –cuando “un topónimu tenga usu xeneralizáu na so forma tradicional y en castellanu”–, nun escaez que llueu la forma que s’emplega ye siempre la castellanizada, arrequexando l’asturiana. “Que nun quieran engañar con un apueste falsu pol billingüismu; nun ye más qu'odiu hacia la llingua asturiana y complexu d'inferioridá”, afirmen al tiempu que critiquen el “cosmopaletismu” qu’amuesen los partíos de Valdés y citen al Padre Galo, “un valdesanu universal que llevó'l nome del so conceyu per tol mundu: ‘Si a Cadavéu tu nun chegas / you a Ḷḷubarca nun chegu’”.

Apoyu al trabayu de la Xunta Asesora de Toponimia

“Pidimos al Gobiernu asturianu y, en concreto, a la Conseyería de Cultura, que nun dean nengún pasu atrás col procesu de recuperación de los nomes tradicionales de los llugares d'Asturies. Ye'l momentu de mostrar l'apoyu al trabayu de la Xunta de Toponimia, basáu nel llabor d'espertos y que cuntó col consensu de toles fuercies polítiques de Valdés, eses qu'agora se desdicen de lo qu'aprobaron va cinco años”, fina’l coleutivu cívicu.