Tintín viaxa a la Lluna y pasia pel satélite n’asturianu

El xueves viniente, 5 de payares, va tar a la venta nes llibreríes del país ‘Oxetivu la Lluna’, númberu 16 de ‘Les aventures de Tintín’. Trátase del primer cómic del personaxe creáu por Hergé lleváu al asturianu poles editoriales catalanes Zephyrum y Trilita, que se va completar a finales de mes con ‘Pasiando pela Lluna’.

D’esta forma, la llingua asturiana incorpórose, xunto al mallorquín, al proyeutu d’estes dos empreses pa llevar les histories de Tintín a llingües minorizaes del Estáu qu’arrancó l’añu pasáu con ‘Les Bijoux de la Castafiore’, númberu 21 de la serie, que tuvo tornes n’aragonés, aranés, eusquera, gallegu y al nomáu n’Estremaúra ‘castúo’. “Punxéronse en contauto con nós munches persones d’Asturies intereaes en lleer a Tintín n’asturianu y por esti motivu agora facemos estes dos versiones”, esplica Albert Mestres, responsable de Trilita Ediciones.

Pa la realización del proyeutu escoyóse a María Xosé Rodríguez López, responsable tamién de les esitoses tornes d’Astérix al asturianu, pa trayer los testos d’estos dos cómics de Tintín del francés al nuesu idioma. Mentes, Xesús González Rato encargóse tamién de la correición.

El proyeutu d’estes dos editoriales, a diferencia del de Bruño-Salvat col personaxe francés, nun ta siguiendo un orde. “Taben programándose una serie d’esposiciones sobre Tintín y la Lluna, d’ehí’l motivu pa escoyer estos dos álbumes pa siguir con esti prestosu proyeutu”, rellata Mestres, optimista pol recibimientu que van tener estes dos histories n’asturianu del personaxe belga, con una tirada de 1.000 exemplares caúna.

Son los númberos 16 y 17: ‘Objectif Lune’ y ‘On a marché sur la Lune’, que se van trayer a Asturies como ‘Oxetivu la Lluna’ y ‘Pasiando pela Lluna’. El primeru va salir a la venta’l xueves viniente, 5 de payares, mentes que la salida del segundu ta programada pa finales d’esi mes.

Dos histories nos 80

Estos dos histories nun son les primeres de Tintín n’asturianu. Nel añu 1988 la editorial Aína asoleyara los álbumes 7, ‘La islla prieta’, y 19, ‘Stock de cock’, con tornes de Xosé Antón González Riaño y Ignaciu Llope, y grafismos d’Ástur Paredes, exemplares mui demandaos por coleicionistes, que llegaron a pagar cantidaes altes de dineru por ellos.