L’aventura de Tintín ‘Pasiando pela Lluna’ aporta esta selmana a les llibreríes asturianes

El xueves ye la fecha prevista de salida a la venta de la segunda de ‘Les aventures de Tintín’ tornaes al asturianu que les editoriales catalanes Zephyrum y Trilita asoleyen esta seronda. Trátase de ‘Pasiando pela lluna’, que da continuidá a ‘Oxetivu la Lluna’, álbumes númberu 16 y 17 de la serie del personaxe creáu por Hergé.

Con unos díes de retrasu por motivos de distribución con respeuto a la fecha anunciada, 5 de payares, aportó a les llibreríes asturianes la primer torna de Tintín en llingua asturiana en 32 años. Nel 1988, el proyeutu editorial Aína, de José Suárez Arias-Cachero 'Felechosa', traxera al nuesu idioma ‘La islla prieta’ y ‘Stock de cock’, un vacíu de trés décades que cubre agora esta iniciativa nacida en Catalunya que lleva tamién les histories de Tintín al eusquera, gallego, aranés, aragonés, mallorquín y al nomáu n’Estremaúra ‘castúo’.

Cuasi un mes más tarde, l’esperáu ‘Pasiando pela Lluna’, con torna de María Xosé Rodríguez López y correición de Xesús González Rato, responsables tamién de ‘Oxetivu la Lluna’, va tar a disposición de los llectores. Zephyrum recibió d’imprenta’l cómic el pasáu día 20, unviándose a Asturies pa la so distribución la selmana pasada cola previsión de ponelu a la venta esti xueves, anque dende la editorial nun se descarta que los exemplares puedan tar nes llibreríes inclusive enantes d’esta fecha.