Sigue'l descensu de casos: 252 contaxos diarios de media la selmana pasada

Yá baxara de forma previa de 508 a 344 tres acumular ascensos continuos dende qu'entamara la segunda fola de COVID-19.

Na selmana última Asturies sumó 1.763 casos nuevos al pasar de 21.569 a 23.332 –23.336 nes cifres oficiales al sumar casos de díes previos non contabilizaos–. Supón una media diaria de 252 contaxos, acumulando asina dos descensos siguíos.

Dende la selmana postrera d'agostu, cuando Asturies.com comenzó a calcular esti datu, les cifres nun pararon de medrar, pasando de 39 diarios de media a 46, 52, 83, 92, 92, 150, 210, 272, 334, 408 y 508, momentu nel que menguó a 344. Una evolución que confirma una ameyoramientu de los datos de la pandemia tres algamar cifres récor esti mesmu mes de payares, anque les cantidaes siguen siendo altes.

Na fin de selmana detectáronse 587 casos nuevos –590 nos datos oficiales–: 261 el vienres, 141 el sábadu y 185 ayeri, cuando la tasa de positividá asitióse nun 5,82 por cientu tres la realización de 4.110 pruebes PCR. Lo dos díes previos el porcentaxe foi del 5,95 y del 3,93 por cientu, de manera respeutiva.

Más de 1.000 finaos

49 persones –50 nos datos oficiales– finaron esta fin de selmana cola enfermedá causada pol coronavirus SARS-CoV-2, 37 muyeres y 12 homes: 22 el vienres, 8 el sábadu y 19 ayeri. Dende que principió l'andanciu perdieron la vida un total de 1.006 persones n'Asturies.

Ayeri había hospitalizaos 750 pacientes con confirmación o sospecha de COVID-19, 13 más que'l xueves. Tamién hai que sumar otros 130 que tán na UCI, 6 menos.