La tasa de positividá queda nun 5,73 nuna xornada con 286 casos

Aumenten los contaxos, pero baxa'l porcentaxe al facer 1.000 pruebes PCR más. Hai que llamentar 25 muerte esti xueves.

A falta de conocer los datos oficiales de la COVID-19, la Conseyería de Salú informó de la deteición ayeri de 286 casos nuevos. Son 27 más que'l miércoles, xornada na que la tasa de positividá asitióse nun 5,95 por cientu.

La cifra agora baxó hasta'l 5,73 por cientu tres la realización de 6.700 pruebes PCR poles 5.677 del día anterior. Sicasí, sigue siendo superior al 5 por cientu que marca la Organización Mundial de la Salú pa tener controlada la pandemia.

Na xornada hai que llamentar 25 muertes: quince homes de 97, 91, 89, 88, 86, 84, 84, 82, 81, 80, 80, 77, 76, 69 y 63 años y diez muyeres de 92, 90, 79, 77, 77, 76, 75, 74, 72 y 65, de los que nueve vivíen en residencies. Iguálase asina la segunda peor cifra de tola pandemia, que se dio'l domingu 15 y el xueves 19 –el récor, 27, rexistróse'l llunes–, sumando hasta la fecha 956 finaos.

Otra manera, hai hospitalizaes 737 persones con confirmación o sospecha de COVID-19, amás de los 136 pacientes que tán na UCI. Son 16 y 8 menos que'l miércoles, de manera respeutiva.