Salú comunica 145 contaxos, con una tasa de positividá del 4,47

La llende que marca la OMS pa tener controlada la pandemia ye un 5 por cientu. Hai que llamentar 16 muertes esti llunes.

A falta de la espublización de los datos oficiales de la COVID-19, la Conseyería de Salú informó de la detección de 145 casos ayeri. Son 40 menos de los rexistraos el domingu.

Na xornada fixéronse 4.992 pruebes PCR, polo que la tasa de positividá foi del 4,47 por cientu, inferior tamién a la de les 24 hores anteriores, cuando s'asitió en 5,82 por cientu. Al igual que sábadu (3,93 por cientu), esti indicador torna a baxa del 5 por cientu que marca la Organización Mundial de la Salú (OMS) como llende pa tener baxo control la pandemia tres selmanes superándolu y, inclusive, doblándolu.

Un total de 16 persones perdieron la vida cola enfermedá causada pol coronavirus SARS-CoV-2: diez homes de 100, 88, 87, 87, 86, 84, 74, 72, 70 y 70 años y seis muyeres de 93, 90, 85, 84, 69 y 69, de los que nueve teníen residencia en centros de mayores. Dende que principió l'andanciu'l númberu de finaos asciende a 972.

Hai hospitalizaos 707 pacientes con confirmación o sospecha de COVID-19, 43 menos que'l domingu, a los qu'hai que sumar otros 131 que tán na UCI, 1 más.