¿Por qué celebramos el Día de la Llingua Materna'l 21 de febreru?

Esta xornada reivindícase dende l'añu 2000, pero los fechos que conmemora asocedieron nel 1952 nun país del subcontinente indiu.

La Organización de les Naciones Xuníes pa la Educación, la Ciencia y la Cultura (UNESCO, poles sos sigles n’inglés) escoyó’l 21 de febreru como fecha pa celebrar esta xornada en reconocencia a los trés mozos que morrieron en Bangladesh nel 1952 polos disparos del exércitu paquistanín –qu’ocupaba’l país– nuna manifestación en Dhaka pola defensa de la llingua bengalí. Los sos nomes yeren Abul Barkat, Rafiqddin Ahmed y Shafiur Rahman, dos estudiantes y un contable, de manera respeutiva.

Cuatro años depués, Pakistán declaraba oficial el bengalí xunto al urdu. Bangladesh algamaría la so independencia nel 1971.

El primer Día Internacional de la Llingua Materna foi nel 2000 al recoyer Bangladesh una propuesta d'una asociación canadiense de falantes de diferentes llingües y treslladala a la UNESCO –ye necesario que'l pidimientu lu formalice un estáu miembru–, que l'aprobó na Conferencia Xeneral del 1999. Dende entós, tolos años s’aprovecha esta fecha pa recordar la importancia de preservar toles llingües al ser éstes un patrimoniu común de la humanidá.

Educación multillingüe

El tema escoyíu nesti 2024 pa reivindicar na xornada ye 'Educación multillingüe: un pegollu del aprendizaxe interxeneracional'. Enfocada principalmente p'aquellos países nos que les neñes y neños nun tienen accesu a la escuela, recuerda que "la educación na llingua materna apoya l'aprendizaxe, l'alfabetización y la adquisición d'idiomes adicionales".

N'Asturies nesta xornada reivindícase les dos llingües propies, les de casa.