Celebración y reivindicación: asina festexa Asturies el Día de la Llingua Materna

Escueles, Gobiernu y conceyos entamen actividaes pa conmemorar esta xornada.

Güei, 21 de febreru, celébrase'l Día Internacional de la Llingua Materna. Ye por ello que n'Asturies se reivindica l'asturianu y el gallego-asturiano.

Ye na escuela onde más se trabaya la importancia del plurillingüismu. Asina tanto güei como nos díes previos maestres y maestros tuvieron preparando esta xornada, pa lo que tuvieron como sofitu los materiales pedagóxicos nuevos asoleyaos pola Conseyería de Cultura.

Asina, actualizóse'l repositoriu de recursos dixitales Estoyu/Estoiro pa que'l profesoráu pueda utilizalu nel aula con un alumnáu nativo dixital hasta superar los 500 recursos n'asturianu y unos 200 en gallego-asturiano, entamaos con criterios educativos. Tamién se crearon seiciones nueves de podcast, aplicaciones y xuegos dixitales, y ufiértense actividaes dixitales pa conmemorar la efeméride nel aula, con conteníos interactivos (‘genially’) o xuegos d'escape.

Teatru y visita al Arqueolóxicu

Dende'l propiu Gobiernu y dende los conceyos vienen entamándose actividaes al rodiu del Día Internacional de la Llingua Materna estos díes y programen pa güei otres munches. A les 18 hores, por exemplu, ta prevista una visita guiada n'asturianu al Muséu Arquelóxicu d’Asturies, a la que va asistir Antón García, direutor xeneral d'Aición Cultural y Normalización Llingüística, y va representase en La Lechera de Cancienes la obra de teatru 'El gorrumbu’, de Saltantes Teatro, obra ganadora del VII Premiu Nel Amaro de Teatru Profesional en Llingua Asturiana o Gallego-asturiano, y a lo llargo de tol día, y hasta'l 30 de xunu, pue visitase nel Parque de la Prehistoria de Teberga la esposición ‘Mensaxes nos abismos. L’arte esquemáticu en Fresneo’.

Xixón presentó'l llunes la concreición dela idea ganadora del VI Premiu Federico González-Fierro Botas a la Meyor Idea Normalizadora, 'Atéchate col asturianu', del IES Fernández Vallín: paragües que visibilicen paragües n'asturianu. Tamién entregó'l la edición nueva del rompecabeces del cuerpu humanu, dedicada a 'El troncu', a les 14 escuelines de 0 a 3 de Xixón, y desendolcó un xuegu de 'sala d'escape' p'alumes y alumnos de Bachilleratu de nome 'L'ayalga perdida'.

Xuegos, talleres y una folixa desendólquense nos centros educativos de Grau y Candamu a lo llargo de la mañana pa conmemorar esta xornada, y en Cangas del Narcea va haber repartu de materiales de 'El ḷḷibru pa lo más pequenín de la casa' y un cuentacuentos. Tamién se va presentar en redes sociales la fase 3 de la campaña 'Asina los chamamos aiquí', dexando pal vienres l'actividá 'Poemas no parabrisas', a cargu del Grupu de Participación Infantil ya Adolescente de Cangas.

Mañana Piloña presenta una representación de teatru al rodiu la xornada. Va ser a les 19 hores na Casa la Cultura de L'Infiestu onde Producciones Nun Tris va poner n'escena 'La sierva patrona', de Giovanni Battista Pergolesi, con versión asturiana adaptada por Antón Caamaño.