El Día de la Llingua Materna vien con actividaes en cuatro conceyos y materiales pedagóxicos nuevos

El 21 de febreru, miércoles, celébrase’l Día de la Llingua Materna y el Gobiernu conmemora esta xornada con actividaes a lo llargo de la selmana en cuatro puntos del país. Amás, presenta materiales pedagóxicos nuevos pa l’aula y propuestes pa festexar la efeméride.

La Viceconseyería de Cultura, Política Llingüística y Deporte fai propuestes sobre patrimoniu arqueolóxicu, artes escéniques y artesanía col oxetivu de revindicar la importancia y la bayura que l'asturianu y el gallego-asturiano representen dientro de la cultura asturiana. El Centru del Prerrománicu Asturianu, n’Uviéu, va acoyer la primera’l domingu al meudía, un taller sobre’l procesáu de la llana y el texíu en telar.

De tarde, en Xixón, nel Teatru de la Llaboral, Carlos Alba va representar ‘El trasgu y el molineru’ a les 17.30 hores, con un preciu de 5 euros, dirixida a mayores de 5 años. Al día siguiente, a les 11 hores, va repetise la función pa escolines y escolinos.

El mesmu miércoles ta programada una visita guiada n’asturianu a la coleición permanente del Muséu Arquelóxicu d’Asturies, tamién n’Uviéu, dende les 18 hores, y La Lechera de Cancienes va ponese n’escena a les 18 hores ‘El gorrumbu’, de Saltantes Teatro, obra ganadora del VII Premiu Nel Amaro de Teatru Profesional en Llingua Asturiana o Gallego-asturiano. Completa’l programa del Día Internacional de la Llingua Materna la esposición ‘Mensaxes nos abismos. L’arte esquemáticu en Fresneo’ nel Parque de la Prehistoria de Teberga, na que se pue ver hasta’l 30 de xunu exemplos d'arte rupestre topaos en cueves del conceyu.

Estoyu/Estoiro

Con motivu d’esta celebración, tamién s’actualizó’ repositoriu de recursos dixitales Estoyu/Estoiro pa que'l profesoráu pueda utilizalu nel aula con un alumnáu nativo dixital. Son más de 500 recursos n'asturianu y unos 200 en gallego-asturiano, entamaos con criterios educativos, qu'incorporen actividaes dedicaes a efemérides concretes y realizaes pol Centru del Profesoráu y Recursos (CPR) Cuenques Mineres.

Tamién se creen seiciones nueves de podcast, aplicaciones y xuegos dixitales. A lo último, ufiértense actividaes dixitales pa conmemorar la efeméride nel aula, con conteníos interactivos (‘genially’) o xuegos d'escape.

El material agrúpase en cuatro bloques: una presentación xeneral, actividaes pa Primaria y Secundaria, pa Secundaria y conteníos d'ediciones anteriores. Amás de la disponibilidá nel portal Educastur, los materiales unviáronse a los más de 300 docentes de Llingua Asturiana y Lliteratura esistentes nel país.

Na semeya, representación de 'El gorrumbu'.