El XIII María Xosefa Canellada ye pa la obra ‘La curuxa Catuxa’ fecha a comuña por Vero Suari y Inaciu Galán

El xuráu del XIII Premiu María Xosefa Canellada de lliteratura infantil y xuvenil, qu’aconceyó de manera telemática pola actual situación sanitaria pola pandemia de COVID-19, decidióse por ‘La curuxa Catuxa’ como obra merecedora del gallardón. Los xixoneses Vero Suari y Inaciu Galán escribieron esta historia a comuña.

El direutor xeneral de Política Llingüística, Antón García, presidió la xunta na que participaron l’alcalde de Cabranes, Gerardo Fabián; Alonso Zamora Canellada, familiar de María Xosefa Canellada; les escritores Alba Carballo y Iris Díaz Trancho; y Penélope Miranda, responsable del serviciu de Normalización Llingüística de Ḷḷena, con Juncal García Velasco, xefa de serviciu de la direición xeneral, como secretaria. Nel acta destaquen qu’esti trabayu ye un exemplu de “cómo se llogra anovar una tradición del imaxinariu colectivu universal adaptándola a la cultura asturiana, nuna obra pa primeros llectores na que destaquen, dende la cenciellez didáctica cola que ta escrita, los valores firmes que tresmite, y un léxicu escoyío y curiao”.

Los autores de ‘La curuxa Catuxa’ son Suari y Galán. La primera ye diplomada en xestión d'empreses turístiques y trabaya nel ámbitu de la información turística y cultural, collaborando cola revista ‘Viaxast’ y la plataforma ‘VerAsturies.com’, mentes que’l so compañeru na ellaboración de la obra ganadora ye una cara bien conocida al ser el primer presidente d’Iniciativa pol Asturianu, presentar programes en TPA y participar n’espacios de ‘Alderiques d’Asturies’, y contar con una amplia trayeutoria lliteraria, con ‘Cartes nel horru (y delles hestories más)’ como títulu últimu espublizáu.

Pendiente’l Xosefa Xovellanos

Tres el fallu del María Xosefa Canellada yá se conocen 4 de los 5 Premios Lliterarios 2020 qu’entrega la Conseyería de Cultura, Política Llingüística y Turismu. Alberto Vázquez García lleva’l XII Premiu Alfonso Iglesias de cómic gracies al so trabayu ‘El sol na escombrera’; Alejandro Fernández-Osorio’l XXVI Xuan María Acebal de poesía con ‘Tayu’; y Xune Elipe’l XXVI Premiu Máximo Fuertes Acevedo d’ensayu por ‘Hai una llinia trazada. Historia de la música asturiana’.

El 11 de payares va aconceyar el xuráu del XLI Xosefa Xovellanos de novela, el más antiguu de tolos gallardones. La obra ganadora en caúna de les estayes lleva una recompensa de 5.000 euros.