Podemos fai una propuesta con cambios nel IRPF y Tresmisiones Patrimoniales pa desbloquiar la reforma

“Estes propuestes en materia de fiscalidá toquen elementos clave, pensamos que pueden ser asumíes nesta mesa de negociación y atienden dalgunes de les reclamaciones de Foro”, apuntó Rafael Palacios, voceru de Podemos. Les mesmes planteguen cambios nel IRPF y Tresmisiones Patrimoniales, pero refuga aumentar el mínimu exentu en socesiones, bonificando namái dellos casos nel mediu rural.

“De la mesa nun nos vamos llevantar. #oficialidaya” espresaben ayeri en redes sociales Sofía Fernández Castañón y Rafael Palacios, coordinadora y voceru parllamentariu de Podemos Asturies. Esta mañana entrambos presentaben una propuesta en materia fiscal cola intención desbloquiar les negociaciones de la reforma estatutaria, paralizaes oficialmente dende’l llunes, anque nunca finaes según espresaben tolos implicaos estos díes.

Castañón apuntaba que “ye necesario poder tener un xestu, que nun pue dir por aceptar dalgunes esixencies que son propies d’una axenda represiva en materia fiscal, pero sí entendemos que podemos atopar espacios d’alcuentru pa poder facer la propuesta que güei queremos presentar pa salir d’esta situación de bloquéu. Porque sabemos que décades de llucha pola oficialidá lo que nos ta pidiendo ye que trabayemos hasta l’últimu minutu y qu’atopemos les soluciones a cada problema”.

“Tienen como oxetivu desbloquiar la reforma del Estatutu d’Autonomía”, insistió Palacios, qu’avanzó que les propuestes yá taben en posesión de tolos voceros de los grupos parllamentarios que participen na negociación. “Son abiertes, intenten superar esta esta situación y arrodiar los problemes que fuimos atopando proponiendo cuestionen que suponen un esfuerzu enorme y una voluntá d’entendimientu pa llograr dalgo que nos paez importantísimu”, siguió’l de Ciañu.

Llucha contra la despoblación

Quixo recordar, enantes d’entrar a esplicar a detalle les propuestes, que “dalgunes cuestiones que plantegaba Foro en materia de fiscalidá nun se pueden conciliar con una propuesta progresista, lo qu’evidentemente nos impide que podamos atopar ámbitos d’entendimientu y fórmules qu’ameyores el sistema fiscal asturianu ensin afeutar la progresividá”. Asina, Podemos entiende que l’impuestu de socesiones “ye un impuestu que namái afeuta a les grandes fortunes y a los grandes patrimonios, polo que nun tendría sentíu xubir el límite exentu de tributación”, como demanda Foro.

El documentu ‘Propuesta de Podemos Asturies en materia de fiscalidá pa desbloquiar la negociación de la reforma del Estatutu d’Autonomía' esplica qu’anguaño hai unes 200 persones ente los grupos I y II d’herederos direutos que pagues socesiones y cola propuesta del partíu representáu nos aconceyamientos pol so secretariu xeneral y diputáu, Adrián Pumares, afeutaría a “malpenes una decena de persones”. “Beneficiaríense un puñáu de grandes fortunes a costa de deteriorar los ingresos que díbemos destinar a los servicios sociales, a potenciar la sanidá y la educación pública, perxudicando a cientos de miles d’asturianos y asturianes”, argumentó Palacios.

Sí acepta modificar la formación morada l'afitamentu d’una bonificación a la cuota de les persones qu’alquieren una vivienda habitual nel mediu rural por una muerte, pa “que contribuya a lluchar contra la despoblación y sía un impulsu al ámbitu demográficu, qu’amás ye una de les cuestiones que taba plantegando Foro”. En materia de donaciones, propónse la reducción del tipu impositivu pa les inferiores a 300.000 dientru de los grupos I y II de parentescu (descendientes, ascendientes y esposu o esposa) cola intención de facilitar les donaciones por parte de los padres y madres a los sos fíos y fíes pa favorecer, por exemplu, l’accesu a una vivienda.

Trés primeros tramos del IRPF

La demanda de Foro con respeuto al Impuestu sobre la Renta de les Persones Físiques (IRPF) consistía en reducir mediu puntu porcentual nos cuatro primeros tramos autonómicos, esto ye, hasta les rentes de 53.000 euros. Podemos plantega facelo namái nos trés primeros, hasta los 33.000 euros, pa favorecer “a les persones con menos recursos y que tán sufriendo más direutamente los efeutos de la pandemia” ensin que se resientan de manera importante los ingresos.

Les propuestes fiscales complétense con modificaciones nel Impuestu de Tresmisiones Patrimoniales y Actos Xurídicos Documentaos, que grava les compraventes de viviendes y vehículos de segunda mano “y que presenta na configuración actual un seriu problema”, apuntó Palacios. Según esplicó, les viviendes perbaxo de los 300.000 euros paguen un mesmu tipu del 8 por cientu, pagando lo mesmo una de 120.000 qu’otra de 280.000, polo que plantega “tipos diferentes pa viviendes por debaxo de 175.000 euros y pa les que tean ente 175.000 y 300.000 euros”.

Tamién plantega un tipu reducíu del 6,5 por cientu pa l’alquisición de la vivienda que vaya constituyir la primera habitual de mozos menores de 35 años con renta que nun supere los 25.000 euros, en tributación individual, o los 40.000 euros, en tributación conxunta, y pa bienes inmuebles por menores de 35 años que sían empresarios o profesionales, o por sociedaes mercantiles participaes direutamente na so totalidá por mozos d’esa edá. D’igual forma, propón afitar un tipu reducíu del 3 por cientu na merca de la vivienda que vaya constituyir la vivienda habitual d’una familia numberosa siempre que la renta del suxetu pasivu, el so esposu o esposa, los descendientes y ascendientes que convivan con ellos y demás persones qu’habiten na vivienda, nun pase, en conxuntu, de los 45.000 euros.

"Falaremos d'otres propuestes"

“Estes propuestes en materia de fiscalidá toquen elementos clave, pensamos que pueden ser asumíes nesta mesa de negociación y atienden dalgunes de les reclamaciones de Foro”, aseguró Rafael Palacios al finalizar la esplicación de tolos puntos, que rescampló que "esperamos les contrapropuestes y les discusiones, porque ye un documentu abiertu; nun ye un documentu final, nin una llinia colorada". “Equí, agora, traemos esta propuesta, falemos d’esta propuesta. Si quieren falar d’otres propuestes, falaremos d’otres propuestes. Nun nos vamos llevantar de la mesa hasta que tengamos un alcuerdu que permita abrir el procesu de reforma del Estatutu pa que reconozan de manera oficial les llingües propies d’Asturies”, añadió Castañón.

Na semeya, obra d'Iván G. Fernández, Palacios y Castañón nuna imaxe d'archivu.