La FSA refuga modificar la fiscalidá y la reforma del Estatutu d'Autonomía entra nuna vía muerta

|
Comisión Executiva FSA fin negociación fiscal Estatutu

La Comisión Executiva de la Federación Socialista Asturiana (FSA) refuga la propuesta fiscal de Podemos y da por rota la negociación no qu’a impuestos se refier. Afirma, sicasí, tener una “voluntá sincera y decidida” de sacar alantre una reforma del Estatutu qu’entra nuna vía muerta daes les posiciones que caltienen los partíos involucraos.

"El Partido Socialista lo que diz ye que nun va tar n'otra mesa", resumió Gimena Llamedo, secretaria d'Organización de la FSA-PSOE. Nuna posición asemeyada a la d'Izquierda Xunida (IX), los socialistes acepten ponese de llau no que respeuta a les modificaciones fiscales pa siguir cola negociación centrada na reforma estatutaria, pero a diferencia de la fórmula plantegada pola coalición, ésta paez inviable.

Asina Llamedo encamienta a Podemos y Foro a qu'esploren "una vía pela derecha" que tien difícil encaxe. "Si per esa vía consiguen espeyar la cuestión fiscal y Foro ve cumplíu'l so oxetivu, la FSA-PSOE va tar abierta a siguir negociando una reforma estatutaria", añadió.

Enantes, criticara la proposición de la formación morada por provocar "xusto lo contrario a lo que dicía pretender. Si ésta yera realmente una propuesta de desbloquéu pa esta mesa de negociación, llama l'atención porque conocíen la postura d'Izquierda Xunida de que nun taría dispuestu a una baxada d'impuestos" que calificó de "regresiva" y valoró en 35 millones d'euros. Desveló que recibieron el documentu 5 minutos enantes de que Rafael Palacios y Sofía Fernández Castañón lu fixeren públicu, "ensin buscar previamente el consensu ente les fuercies de la izquierda".

Recordó tamién que la postura del so partíu dende un primer momentu yera que "cualquier pautu nel que participase la FSA-PSOE nuna materia que nun forme parte de la reforma estatutaria debería ser per aciu del alcuerdu de les trés fuercies de la izquierda asturiana con Foro" porque entiende que ye "la opción más responsable pa garantizar el mayor consensu posible". Pa finar Llamedo insistió en que la reforma del Estatutu ye una prioridá pa los socialistes "p'avanzar nel autogobiernu, impulsar reformes como la eleutoral y reconocer la oficialidá de les llingües propies d'Asturies" y caltién una voluntá "sincera y decidida" de siguir dialogando pa llegar a un alcuerdu p'aprobar una nueva norma autonómica.

Contador Estadistiques