Foro retoma les negociaciones llueu d’analizar la propuesta fiscal de Podemos

“Tien los requisitos mínimos p’avanzar na busca d’un alcuerdu”, comunicó esti llunes el Comité Executivu de Foro al respeuto de la propuesta fiscal de Podemos. Una selmana depués de que quedaren bloquiaes les negociaciones pa la reforma del Estatutu qu’incluya la oficialidá, Foro amuesa la so disposición a retomar les conversaciones.

“Dende Foro Asturias analizamos téunicamente la propuesta de Podemos y, almitiendo meyores, paeznos que tien los requisitos mínimos p’avanzar na busca d’un alcuerdu”, entama la declaración fecha pol Comité Executivu, órganu de direición colexáu al que-y correspuende la xestión ordinaria de la formación política asturiana. “Tamos dispuestos a sentanos colos otros 3 partidos pa, anque paeza tarde, iniciar la negociación”, sigue’l testu.

El comunicáu rescampla “la importancia de les reformes que defendemos, tanto la fiscal como la reforma del Estatutu”, y fina llamentando “la intransixencia d’IX y del PP nun momentu clave p’Asturies”. La coalición desvenceyóse’l sábadu de la propuesta de Podemos, afirmando que “paez que l’alcuerdu Podemos-Foro pa reformar los impuestos n’Asturies, pa baxalos, pudiera yá contar con mayoría parllamentaria. Poro, Izquierda Xunida nun ye necesaria pa esa tramitación y lo que pide ye que nun se contamine la mesa del Estatutu pola tramitación de la fiscalidá: la mesa del Estatutu yá nun tiene por qué siguir bloquiada, yá nun tien por qué tar contaminada pol alderique fiscal”, aseguró’l so secretariu d’Estratexa Política, Alejandro Suárez.

Na semeya, Pumares, secretariu xeneral de Foro y encargáu de participar nes negociaciones, na so intervención na Xunta Xeneral nel Plenu monográficu sobre l'aición de gobiernu, referíu a la industria asturiana, del miércoles.