Reforma del Estatutu: “tovía hai posibilidá”

|
Manifestación oficialidá 16-0 XDLA panorámica dende Escandalera

Nin Podemos nin Izquierda Xunida (IX) dan por finaes les negociaciones pa la reforma del Estatutu d’Autonomía pa incluyir la oficialidá, magar que reconocen que nesti momentu tán nun momentu de ‘impasse’ pola postura que caltién Foro con respeuto a les sos esixencies fiscales. “Tovía hai posibilidá”, confirmen entrambes organizaciones.

“La negociación sigue ehí, nin s’acabó nin ta zarrada”, apunta Rafael Palacios, representante de Podemos na negociación xunto con Sofía Fernández Castañón. “Los teléfonos tán abiertos”, añade’l de Ciañu, que magar el parón nel procesu que se vive depués de la postura amosada por Adrián Pumares nel axuntamientu celebráu’l llunes, considera que “hai posibilidaes” de desbloquiar la situación.

“Tovía hai posibilidá”, coincide Víctor Suárez, presente nos alcuentros xunto con Alejandro Suárez. El responsable de Política Llingüística y Autogobiernu d’IX afirma que “la puerta ta abierta siempre” a la negociación, anque recuerda que foi Foro’l que se llevantó de la mesa’l llunes cuando “la llinia colorada yeren los trés quintos” que les trés fuercies d’izquierda aceptaron.

Dambes organizaciones afirmen que nun hebo más contautos con Foro dende dichu alcuentru, pero nun quieren dar entá por finada la negociación. Les visiones diferentes tán nos tiempos, yá qu’IX sigue considerando’l 31 de xineru como una fecha clave: “más alla d’ehí, cómennos los plazos”, asegura Suárez.

Pela so parte, Palacios prefier nun “poner feches concretes que namái xeneren espeutatives” y da prioridá a que la cuestión llegue a bon puertu. Sicasí, lo qu’asoceda nos díes próximos va ser clave pa desbloquiar la situación o, por contra, llevará a empezar a considerar fallida la reforma estatutaria.

Na semeya, asistentes a la históricu manifestación pola oficialidá del pasáu 16 d'ochobre entamada pola Xunta pola Defensa de la Llingua Asturiana coincidendo cola apertura del procesu de reforma del Estatutu.

Contador Estadistiques