Nun habrá cortes de tráficu ferroviariu, pero sí retrasu nuevu na apertura de la variante

|
Raquel Sánchez Jiménez, Adrián Barbón, Delia Losa, Santiago Dorado y Maria Luisa Domínguez González

La llegada de la velocidá alta per Payares taba anunciada pa mayu, pero la delegada del Gobiernu estatal n'Asturies, Delia Losa, faló esti xueves del "primer semestre" d'esti añu.

Una de cal y otra d'arena. El Gobiernu pautó col Ministeriu de Tresportes, Movilidá y Axenda Urbana adaptar la planificación de les obras nel tramu Ḷḷena y Uviéu pa evitar el corte del serviciu ferroviariu en fin de selmana per cuasi cuatro años, pero la fecha d'apertura de la eterna variante retrásase per enésima vez.

"Esi semestre, yá nun m'atrevo a dicir más, entrará en funcionamientu la variante de payares", declaró esta mañana Losa nuna intervención pa facer balance del añu 2022. Argumenta que l'Axencia Estatal de Seguridá Ferroviaria, que tien que dar el preste a l'activación del serviciu, "nun se pronunció".

L'actual ministra, Raquel Sánchez Jiménez, en setiembre del 2021, falara del 2023 como fecha d'apertura de los túneles, y l'abril pasáu confirmara'l primer trimestre d'esti añu nuna visita a Ribeseya. Sicasí, en xunu na visita d'Adrián Barbón a Madrid señaló-y mayu al presidente, otra meta que paez que nun se va algamar nel desendolcu d'una obra clave p'Asturies qu'en febreru cumple 18 años.

Conceyu con Adif

No que respeuta al tramu Ḷḷena-Uviéu, Alejandro Calvo, va caltener un conceyu con responsables d'Adif la selmana qu'entra p'analizar y concretar los aspeutos téunicos d'esta intervención. El conseyeru de Mediu Rural y Cohesión Territorial va plantegar distintes alternativas qu'eviten la interrupción del serviciu ferroviariu en fin de selmana obligando a los viaxeros a cambiar a un autocar, como que los trabayos que se faigan a partir del 2024 sían pela nueche y con zarros alternativos d'una de les dos víes de la llinia.

La postura del Gobiernu con respeuto a la variante, mentes, ye que s'abra nel menor tiempu posible, "entendiendo que la prioridá debe ser la seguridá y la fiabilidá de la llinia", asegura Calvo.

Na semeya, Sánchez Jiménez; Barbón; Losa; l'alcalde de La Roba, Santiago Dorado; y la presidenta d'Adif, Maria Luisa Domínguez González, el payares pasáu nuna visita a les obres de la variante.

Contador Estadistiques