Tresportes marca marzu o abril como momentu pa conocer la fecha concreta d’apertura de la variante

Isabel Pardo de Vera, secretaria d’Estáu de Tresportes, Movilidá y Axenda Urbana, tuvo esti martes n’Asturies pa informar a los axentes sociales sobre’l retrasu na apertura de la variante de Payares, de lo que pidió “disculpes”. Aseguró que depués de les pruebes de seguranza, marzu o abril, va poder marcar una fecha pal entamu de la circulación de los trenes de velocidá alta pelos túneles.

Llueu del alcuentru colos axentes sociales, nuna comparecencia acompañada por Adrián Barbón, presidente del país, y Alejandro Calvo, conseyeru de Mediu Rural y Cohesión Territorial, esplicó que la previsión del ministeriu yera que la estaya d’Adif de Construcción y infraestructura trespasara “na segunda quincena d’avientu” la vía a Circulación y Caltenimientu. Retrasos en suministros de materiales “de trés o cuatro díes” acumuláronse impidiendo llegar a esa fecha que Pardo de Vera asitia agora “na segunda quincena de febreru, polo que toi falando d’ocho selmanes, dos meses, de retrasu respeuto a la programación que nel so día se dio al presidente”.

“Llueu vendrán les pruebes de fiabilidá, entendemos que nel mes siguiente, ente marzu y abril, y depués vendrá la formación de maquinistes” y demás cuestiones, siguió. Una fecha, marzu o abril, na que, señaló, yá se podría poner la concreta d’apertura de la variante, obra en marcha dende’l 2004 de la que xustificó’l so retrasu a intromisiones polítiques nel pasáu, llegando a señalar específicamente a Francisco Álvarez-Cascos na so etapa en Foro, formación que fundó y del que foi espulsáu pola direición actual.

Barbón, pela so parte, celebró que “esti axuntamientu aporta certeces: la certeza de que la variante abrirá en mui pocos meses al tráficu comercial y la certeza de que nun habrá cortes entre La Pola, Uviéu y Xixón, esto ye, que’l que se xuba a un tren en Madrid se podrá baxar n’Uviéu o Xixón”. D’igual forma, afirmó que’l ministeriu tien “una deuda histórica con Asturies y ye una deuda qu’hai que saldar”.

Na semeya, Barbón y Pardo de Vera.