El Gobiernu refuga los cortes mientres la renovación del tramu de ferrocarril ente Ḷḷena y Uviéu

La intención d’Adif de modernizar el tramu de ferrocarril ente Ḷḷena y Uviéu programando cortes de tráficu en fin de selmana, lo qu’obligaría a los viaxeros a facer esi tramu n’autocar, refúgala dafechu’l Gobiernu. “Tamos falando d’un tramu de doble vía y ye compatible les obres con que nun haya afeición al tráficu”, aseguró’l conseyeru de Mediu Rural y Cohesión Territorial, Alejandro Calvo.

Lo que paecía’l fin del calvariu pa los usuarios del tren n’Asturies pa salir o llegar pel sur cola apertura de la variante de Payares, prevista pa mayu, torcióse col conocimientu de la intención d’Adif de llicitar la modernización del tramu de ferrocarril ente Ḷḷena y Uviéu, cola programación d’entamar cortes en fin de selmana per cuasi 4 años. Una situación qu’obligaría a los pasaxeros a facer esti desplazamientu n’autocar pa siguir el so viaxe.

El Gobiernu refuga dafechu esta posibilidá y asina lo treslladó al Ministeriu de Tresportes, Movilidá y Axenda Urbana. “Los documentos que trescendieron, de calter téunicu, son perfeutamente revisables nos pasos que queden per delante pa que, cuando llegue la llicitación d’esta renovación, que ye una bona noticia, se faiga pa que nun se produza esta afeutación”, apuntó Calvo.

El responsable de Mediu Rural y Cohesión Territorial considera que “tamos falando d’un tramu que tien doble vía y ye perfeutamente compatible’l desendolcu de les obres con que nun haya afeiciones al tráficu y asina vamos esixilo”. En definitiva, reclama que se rectifique una decisión téunica y se tenga en cuenta “la realidá del nuesu territoriu y les prioridaes del Gobiernu asturianu, de los asturianos y del nuesu sector empresarial”.

Na semeya, Calvo preside esta mañana la mesa nun aconceyamientu con representantes de l'Asociación de Jóvenes Empresarios (AJE).