Navarro y Pelayo Sánchez, asturianos en La Vuelta de la estrena del Altu d'El Gamoniteiru

Trés etapes van pasar per Asturies.

Mañana el pelotón de La Vuelta va empezar a dar pedalaes en Burgos con dos asturianos en carrera, dambos del equipu Burgos-BH. Son el veteranu Dani Navarro y el debutante Pelayo Sánchez Mayo.

Con Roglic (Jumbo-Visma), ganador de les dos últimes ediciones, como principal favoritu pa llegar de mariellu a Santiago, y Carapaz, Bernal y Yates (Ineos Grenadiers), Mas y 'Superman' López (Movistar) y Landa (Bahrain Victorious) como aspirantes, la competición ciclista va decidise nes etapes asturianes, que van tener llugar na selmana última. La decimosétima de les 21 va salir d'Unquera'l 1 de setiembre y va tener final en Los Llagos tres dos pasos per La Collada Llomena.

Al día siguiente va estrenase El Gamoniteiru, cita más esperada esti añu de La Vuelta. Los corredores van partir de Salas y van xubir San Ḷḷaurienzu, La Cobertoria y l'Altu la Segá, enantes d'encarar les ramples de la cima adaptada nel so tramu final pa recibir al pelotón.

El día 3, camín de Santiago, los ciclistes van arrancar en Tapia, pa xirar contra l’interior n’A Veiga hasta Os Ozcos con pasu pel Alto da Sela d’Entorcisa, l’Alto la Garganta y l’Alto de Barbeitos, y finar en Galicia, en Monforte de Lemos.

Respetu de la toponimia

Per primer vegada, la organización de La Vuelta respeta la toponimia oficial d'Asturies. Asina, el llibru de ruta recueye los topónimos tradicionales tanto de poblaciones como de puertos pelos que pasa la carrera, al igual que venía faciendo n'otros territorios con llingua propia.

Na imaxe, equipu del Burgos-BH en La Vuelta. Semeya propiedá del Burgos-BH.