"La intervención ye perfeutamente comprensible”, respuende Marcos a Blanco tres una quexa pol usu del gallego-asturiano na Xunta

Rafael Palacios emplegó’l gallego-asturiano na defensa d’una proposición non de llei sobre’l Museo Etnográfico de Grandas de Salime. Ignacio Blanco, na primer intervención nuna de les llingües propies d’Asturies tres la reforma del Reglamentu de la Xunta Xeneral, tornó a interrumpir al diputáu de Podemos, interviniendo’l presidente Marcelino Marcos ente la quexa del de VOX.

“Llamento interrumpir al señor Palacios, pido la pallabra. ¿Instrumentóse por parte de la Mesa dalgún sistema pa que podamos entender? Yo entiendo dalguna parte, pero hai pallabres que nun entiendo”, espresó Blanco a los 28 segundos de discursu. “A consideración de la Presidencia, hasta agora la intervención ye perfeutamete comprensible. Si hai dalguna pallabra que vusté nun entienda, al final de la intervención del señor Palacios indíquelo a la Presidencia y que’l señor Palacios-y traduza eses pallabres”, respondió Marcos enantes de dar pasu otra vegada al diputáu de Podemos na defensa d’una proposición non de llei sobre’l modelu de xestión y reconocimientu del Museo Etnográfico de Grandas de Salime.

Yera la primer vegada na que s’emplegaba una de les dos llingües propies d’Asturies na Cámara tres la modificación del Reglamentu de la Xunta Xeneral el pasáu día 1 pa permitir l’usu del asturianu non sólo a diputaos, sinón tamién a cualquier persona que compareza nel Parllamentu. VOX, esi día, amenazó con nun tomar parte nos alderiques “que s’espongan esclusivamente en llingua, n'asturianu o n'asturñol porque nun lo entendemos y nun tenemos intención nenguna d’estudialo”, pero ayeri nel Plenu sí participó, según esplicó, por pidimientu de los sos votantes “pa que nun se-yos silenciara por usar un llinguaxe que simplemente nun entendemos na so integridá”.

Diferente foi la postura del diputáu del PP pol occidente Álvaro Queipo, qu’agradeció “enormemente” a Palacios “que fale na fala nesta Cámara, úa Cámara que normalmente o muitas veces esqueice que el occidente esiste y tamén fala”.

Seis votaciones

La proposición non de llei sobre’l modelu de xestión y reconocimientu del Museo Etnográfico de Grandas de Salime, con dos enmiendes del PP y Ciudadanos aceptaes por Podemos, que refugó la votación por puntos solicitada pola FSA, tuvo marcada poles equivocaciones, los empates y problemes a la hora de votar, qu’obligaron a repetila per seis vegaes. Finalmente quedó refugada por 23 ‘non’ y 21 ‘sí’ –hebo una ausencia nel Plenu d’un diputada popular– dada la posición contraria de la FSA y VOX, y el votu d’Ovidio Zapico magar que la postura d’Asturies pela Izquierda (IX-IAS) yera la de posicionase a favor.

Na semeya, Marcos diríxese a Blanco pa entruga-y si hebo dalguna pallabra de Palacios que nun entendiera.