Les bases del Premiu Pachín de Melás, que yá tien imaxe, salen a información pública

L’octavu de los Premios Lliterarios, el Pachín de Melás de testos teatrales, yá tien imaxe, que sigue la llinia gráfica del restu de gallardones. Esti vienres salieron a información pública les bases reguladores d’un premiu que va permitir la espublización de la obra ganadora y la so coproducción por una compañía profesional.

Na web ‘Asturias participa’ ta disponible pa la so consulta, en castellanu, la “propuesta de resolución pola que se crea’l Premiu Pachín de Melás de testos teatrales en llingua asturiana y s’aprueben les sos bases reguladores”, cola posibilidá de presentar alegaciones nun periodu de 20 díes hábiles, esto ye, hasta'l 17 de marzu. Según se resume na páxina, “estes bases tienen por oxetu regular la concesión del Premiu Pachín de Melás de testos teatrales en llingua asturiana, al que podrán presentase obres teatrales orixinales escrites en llingua asturiana y que puedan ser representaes con un llargor comprendíu ente 50 y 90 minutos”.

Amás esplica que “nun podrán optar al premiu los testos que sían pieces de teatru breve, adaptaciones, versiones o rellectures d’otros testos publicaos o exhibíos de manera pública”. Les bases afiten que’l ganador va llevar un troféu, una dotación económica –presupuestada pa esti añu en 6.000 euros–, promoción y, “nel derechu de la conseyería competente en materia de política llingüística a la espublización n’esclusiva de la primer edición del testu premiáu na que figure’l premiu y l’añu de concesión, asina como la coproducción de la obra teatral con una compañía de teatru profesional, dando por retribuyíos col premiu los derechos d’autor de la primer edición”.