El Pachín de Melás al meyor testu teatral va ser l’octavu de los Premios Lliterarios

El 2023 va venir con un premiu lliterariu nuevu que se suma a los siete yá esistentes. Ye’l Premiu Pachín de Melás al meyor testu teatral, con una recompensa de 6.000 euros, qu’amás de reconocer la figura d’Emilio Robles Muñiz pretende fomentar la creación n’asturianu.

La Conseyería de Cultura, Política Llingüística y Turismu sigue asina la so apuesta por estos gallardones, con un aumentu de les dotaciones a los yá esistentes y la creación d’otros nuevos. Asina, nel 2019 les recompenses medraron de 3.000 a 5.000 euros, cantidá que nel 2021 quedaría finalmente en 6.000, añu nel que tamién se convocaron per primer vez el Premiu Florina Alías a la meyor traducción al asturianu y el Premiu Enriqueta González Rubín de narrativa moza –dotáu con 3.000 euros–.

Agora llega’l Premiu Pachín de Melás, que va reconocer el meyor testu teatral de tolos presentaos a concursu. D’esta forma Política Llingúística busca cubrir l’ausencia d’esti tipu xéneru nos premios de les nueses lletres y, al empar, complementar el Premiu y Festival Nel Amaro de Teatru Profesional en Llingua Asturiana y Gallego-asturiano, destináu a les producciones teatrales.

Robles Muñiz, nacíu en Xixón nel 1877 y fináu nel 1938 na cárcel d’El Coto, onde taba apresáu polos franquistes, tuvo una estensa obra en llingua asturiana. Espublizó monólogos, sainetes y zarzueles, y escribió artículos en periódicos y rellatos.

Diez concursos

El Premiu Xosefa Xovellanos ye’l decanu de los ocho Premios Lliterarios qu’entama la conseyería. Nel 2023 va convocase la so cuerentena cuarta edición, amás del XXIX Premiu Xuan María Acebal de poesía, el XXIX Premiu Máximo Fuertes Acevedo d'ensayu, el XVI Premiu María Josefa Canellada de lliteratura infantil y xuvenil, el XV Premiu Alfonso Iglesias de cómic, y la tercer edición Florina Alías y l’Enriqueta González Rubín, mentes que va llegar la sétima de Nel Amaro y la decimoquinta del Premiu al Meyor Cantar Camaretá, los dos dientro de la estaya de Premios d’Artes Escéniques.