El Pachín de Melás de testos teatrales va permitir tamién presentar conxuntos de pieces breves

El Premiu Pachín de Melás de testos teatrales yá ye una realidá, pendiente agora de la convocatoria de la primer edición, que se va facer nes selmanes vinientes. La Conseyería de Cultura, Política Llingüística y Turismu aprobó les bases reguladores del gallardón, con dalguna modificación con respeuto al documentu espuestu a información pública.

El plazu d’alegaciones del espediente tuvo abiertu hasta’l 17 de marzu. Una vegada fináu, una resolución firmada por Berta Piñán, con data del 25 d’abril y espublizada güei nel Boletín Oficial del Principáu d’Asturies (BOPA) crea l’octavu de los Premios Lliterarios y aprueba les sos bases reguladores.

Ésta tien delles modificaciones con respeuto al primer testu presentáu. Ente elles apaez correxíu un error nel cuadru de puntación de ‘Riqueza y afayamientu llingüísticu en coherencia col desarrollu de la obra’.

El cambiu principal ye que va permitise’l concursu d’un conxuntu de pieces breves. La redaición concreta ye que “va poder presentase un únicu testu teatral o conxuntu de pieces breves”, quedando fuera “los testos que sían adaptaciones, versiones o rellectures d’otros testos espublizaos o exhibidos públicamente”, cuando na primer redaición apaecía que “van poder presentase obres teatrales orixinales escrites en llingua asturiana” y escluyíase les “pieces de teatru breves”.

El premiu va tener como recompensa una cantidá económica –los Presupuestos d’esti añu destinen 6.000 euros a esta primer edición–, promoción y “nel derechu de la conseyería competente en materia de política llingüística a la espublización n’esclusiva de la primer edición del testu premiáu na que figure’l premiu y l’añu de concesión, asina como la coproducción de la obra teatral con una compañía de teatru profesional, dando por retribuyíos col premiu los derechos d’autor de la primer edición”, añadiendo na redaición final que “de nun ser asina, la persona gallardonada podrá publicar y producir la obra teatral nos términos qu’ésta determine faciendo mención espresa a qu’el testu obtuvo’l Premiu ‘Pachín de Melás’ de Testos Teatrales en llingua asturiana”.

Van poder aspirar a él autores con trabayos que puedan ser representaos y tengan un llargor d’ente 50 y 90 minutos. Col Pachín de Melás, la conseyería busca “fomentar y incentivar la creación d’obres dramátiques n’asturianu y ampliar el corpus d’obras teatrales de la lliteratura en llingua asturiana”.