Convóquense tolos Premios Lliterarios y los dos artísticos y queda a la espera’l Pachín de Melás

Los autores asturianos yá disponen de fecha tope pa presentar les sos creaciones a los siete Premios Lliterarios y los dos artísticos que convoca la Conseyería de Cultura, Política Llingüística y Turismu. Namái queda por anunciase’l gallardón de creación nueva, el Pachín de Melás de testos teatrales, que ta n'información pública hasta esti vienres.

El 17 d’abril ye’l día últimu pa la receición de trabayos n’asturianu en toles categoríes. Éstes son novela (XLIV Premiu Xosefa Xovellanos), poesía (XXIX Premiu Xuan María Acebal), ensayu (XXIX Premiu Máximo Fuertes Acevedo), lliteratura infantil y xuvenil (XVI Premiu María Josefa Canellada), cómic (XV Premiu Alfonso Iglesias) y traducción (III Premiu Florina Elías), completándose los Premios Lliteraros col destináu a menores de 31 años, el de narrativa moza (III Premiu Enriqueta González Rubín).

La mesma fecha queda marcada pa VII Premiu Nel Amaro de Teatru Profesional n’Asturianu o Gallego-asturiano y pal XV Premiu Camaretá al Meyor Cantar, al que se van poder presentar temes espublizaes nel 2022 y los trés primeros meses del 2023. Tolos gallardones tienen una recompensa de 6.000 euros –amás de troféu y actividaes de difusión–, sacante’l de narrativa moza, que reparte 3.000.

Queda pendiente de convocatoria’l Pachín de Melás de testos teatrales, que se crea esti añu. En febreru salieron a información pública les bases reguladores d’esti premiu –el plazu pa presentar alegaciones fina precisamente güei– pa fomentar la creación de obres teatrales orixinales n’asturianu col requisitu de “que puedan ser representaes con un llargor comprendíu ente 50 y 90 minutos”.

Na semeya, un momentu de la intervención de la conseyera Berta Piñán na gala d'entrega de los Premios Lliterarios del 2021, celebrada nel pasáu abril en LLABoral Centru d'Arte y Creación Industrial.