L'Avilés completa la llista d'equipos asturianos na Segunda RFEF

El conxuntu blanquiazul superó al Llanes nel partíu final de les eliminatories pol ascensu y va acompañar a los otros 4 clubes con plaza.

L'Avilés Industrial completa la llista d'equipos asturianos de Segunda RFEF, la categoría de creación nueva que surde de la dixebra de la Segunda División B en dos. En Primera RFEF, la que pasa a ser el tercer nivel del fútbol estatal, con 40 equipos dividíos en dos grupos, nun va haber representación asturiana, tando namái per enriba, otru añu más en Segunda División, el Sporting y l'Uviéu.

Xunto colos del Suárez Puerta van competir l'UP Langreo y el Club Marino, equipos que caltuvieron la categoría, y los ascendíos de manera direuta UC Ceares y Llanera. Nun tuvo un camín cenciellu l'Avilés, afeutáu por casos de COVID-19 na decisiva segunda fase de la lliga, finando como quintu clasificáu, posición que lu obligaba a dir pela vía llarga nes eliminatories pol ascensu.

Sicasí, nun encaxó nin un solo gol nos trés partíos, eliminando al Caudal (2-0), al EI San Martín (0-1) y al Llanes (1-0), na final, con un tantu en propia puerta de Guillermo. Alegría n'Avilés y aliviu pa la propiedá nueva, que fixo una importante inversión con xugadores de categoría superior como Natalio o Cedrick pa dar el saltu de categoría.

Pendientes del grupu

La nueva Segunda RFEF va tar formada por 90 equipos, dividíos en 5 grupos de 18. De primeres, Asturies va xugar con gallegos y cántabros, anque ye posible tamién la presencia de conxuntos de Castilla y Lleón. Pontevedra, Compostela, Laredo o Numancia podríen ser rivales de los cinco clubes asturianos.

Na imaxe, xugadores del Avilés celebren l'ascensu tres el xiblíu del árbitru.