L’alquiler imposible en Xixón: un pisu nel centru de dos dormitorios son 1.200 euros de media

El costu del alquiler nel centru de Xixón nun apara de xubir: nun hai ufierta de menos de 800 euros y los más baratos son estacionales. ¿Les razones? Una d'elles ye la multiplicación de les viviendes d'usu turísticu dende 2015. Éstos son dalgunos datos.

El problema de la vivienda n’Asturies agrávase. L’exemplu de Xixón, la ciudá más poblada y con mayor númberu de viviendes d’usu turísticu, ye significativu.

La ufierta nel centru de Xixón de pisos de dos dormitorios y más de 60 metros cuadraos nun baxa de 800 euros, con una media cercana a los 1.200 euros. Nuna busca fecha por Asturies.com nel portal inmobiliariu Idealista namás s'atoparon 4 a menos d’esi preciu, de los que 2 sólo s’arrienden de setiembre a xunu, esto ye, a estudiantes, teniendo éstos qu’abandonalu pel branu al reclamalu’l propietariu pa destinalu a alquiler turísticu.

El crecimientu del usu de viviendes como agospiu pa visitantes ye una de les causes que provoca esti aumentu del costu del alquiler, al amenorgar la ufierta. Nel 2015 en Xixón había una vivienda d’usu turísticu nel conceyu, que nel 2016 xubió a 3, nel 2017 a 72, nel 2018 a 280…, y que nel 2023 algamó la cifra de 1.464, a los qu’hai que sumar 78 viviendes vacacionales, según los datos aportaos la selmana pasada pola Sociedá Asturiana d'Estudios Económicos y Industriales (Sadei).

Namái en comparanza col 2022, cuando había rexistraos 1.112 pisos turísticos, l’aumentu foi del 31,65 por cientu. Un crecimientu escomanáu que’l Conceyu quier controlar, polo que decicidó en xineru una moratoria d’un añu pa la concesión de llicencies nueves nes zones más saturaes, esto ye, el centru, L'Arena, Cimavilla y El Carme.