Día del Llibru Asturianu

L’ALLA y Política Llinguística alcuerden treslladar el Día y la Selmana de les Lletres Asturianes a la seronda

|
Públicu XL Día de les Lletres Asturianes

“Ye la decisión más sensata”, afirma Xosé Antón González Riaño, presidente de l’Academia de la Llingua Asturiana (ALLA). La institución académica y la Conseyería de Cultura, Política Llingüística y Turismu alcordaron treslladar el XLI Día y la Selmana de les Lletres Asturianes de mayu a depués del branu pola alarma sanitaria.

“Hai unos venti díes yá treslladé a los compañeros de l’Academia la necesidá d’estudiar la posibilidá pola emerxencia social y hai unos diez contautamos cola conseyería”, esplica. Tol trabayu d’organización de la gran fiesta de les nueses lletres taba adelantáu, pero la decisión conxunta foi aplazar la celebración “porque ye claro que’l 8 de mayu nun se pue facer el Día de les Lletres y ye necesario treslladalu conxuntamente cola Selmana”, qu’entama’l Gobiernu.

Asina, el XLI Día y la Selmana de les Lletres Asturianes –programada pa la selmana del 4 de mayu– pasen a la seronda, en fecha entovía por confirmar. La edición d’esti añu taba dedicada a la figura de la escritora María Teresa Villaverde (1881-1934), popularmente conocida col nomatu de Tuxa, y na xunta estraordinaria de l’ALLA diba entregase a Xuan Xosé Sánchez Vicente’l II Premiu Nacional de Lliteratura Asturiana.

“Primero va la xente y depués tolo demás”, asegura González Riaño, que camienta que pa la seronda “yá tea superada esta crisis sanitaria”. Pela so parte, la conseyería, nun comunicáu, apunta “que la situación actual de la crisis del coronavirus, tres la declaración del estáu d'alarma y el decretu de les midíes de confinamientu, aconseya l'aplazamientu de los actos previstos”, garantizando asina “la organización y normal celebración de la principal cita añal de la lliteratura escrita n'asturianu y en gallego-asturiano”.

Na semeya, públicu asistente a la xunta estraordinaria de l'ALLA pol XL Día de les Lletres Asturianes nel Teatru Campoamor.

Contador Estadistiques