La OSPA va ufrir un ‘Conciertu de les Lletres Asturianes’ p’abrir esta edición de la Selmana de les Lletres

El llunes 28 va principiar una reducida Selmana de les Lletres Asturianes por cuenta de la crisis sanitaria pola pandemia de COVID-19. Ente los actos previstos rescampla el ‘Conciertu de les Lletres Asturianes’ que va poner nel Auditoriu d’Uviéu la Orquesta Sinfónica del Principáu d’Asturies (OSPA) con cuatro pieces.

Dedicada a la maliaya María Teresa Villaverde ‘Tuxa’ (1882-1934), escritora del Rexonalismu de la primer metá del sieglu XX que trabayó la poesía y la narrativa y firmó obres de teatru, nesa primer xornada de la XLI Selmana de les Lletres Asturianes va presentase pela mañana el llibru conmemorativu ‘Postrer adiós. Prosa, poesía, teatru’, edición a cargu de Lluis Portal. Va ser a les 12 hores en Villaviciosa, na Casa de los Hevia, y nel mesmu va proyeutase tamién el documental ‘Tuxa, tradición y sentimientu’.

Yá de tarde va tener llugar n’Uviéu’l conciertu de la OPSA que, dirixida por Óliver Díaz, va interpretar ‘Covadonga’, de Facundo de la Viña; ‘Tres danzas sinfónicas’, de Julián Orbón; ‘Asturias desde la distancia’, de Jorge Muñiz; y ‘Escenas asturianas’, de Benito Lauret. L’eventu, gran novedá de la Selmana, va principiar a les 20 hores.

Proyeición d’espectáculos

Dende’l martes, y hasta’l sábadu, van tar disponibles na canal de YouTube de la Llaboral los espectáculos ‘Grana de cardamomu’, d’El Callejón del Gato, destináu a escolinos de Primaria, y ‘Les relaciones peligroses’, de Factoría Norte, obra ganadora del Premiu y Festival Nel Amaro de Teatru Profesional en Llingua Asturiana o Gallego-asturiano del añu pasáu, pa los de Secundaria. De manera presencia, va representase al meudía na Casa Cultura de Santolaya, p’alumnáu de Cabranes de Primaria, ‘Pallabra de vaca’, d’Oli Olé Teatro.

Na uvieína Sala Borrón va entamase a les 19 hores el quintu concursu de microrrellatos improvisaos n’asturianu pa mocedá ‘Entaína a escribir’, y van presentase los llibros ganadores de los Premios Asturies Xoven de poesía, narrativa y testos teatrales 2019, esto ye, ‘Superpoderes’, de Miguel Rodríguez Monteavaro; ‘La Colomina 36’, de Nicolás Bardio; y ‘Basta con tenera ganas’, de Cristian David López, de manera respeutiva. L’Homenaxe ás nosas lletras pasa esti añu a tener llugar el miércoles, a les 19 hores na Casa Cultura d’A Veiga, na que se va presentar el númberu nuevu de ‘Trabatel. Revista eonaviega de lliteratura’, el 11.

Día del Llibru Asturianu

El vienres, día 2 d’ochobre, coincidiendo col LXI Día de les Lletres Asturianes, celébrase tamién el Día del Llibru Asturianu. Como ye vezu, los veceros van tener un 10 por cientu de descuentu en llibros y discos en llingua asturiana en 47 comercios de tol país y van recibir, de baldre, el llibru conmemorativu de la Selmana o, nel Eo-Navia, la revista ‘Trabatel’.