“Había que facer referencia a la Selmana de les Lletres y recordar qu’entá nun hai normalidá”, apunta Pulgar

Esti llunes debía de comenzar la XLI Selmana de les Lletres Asturianes, aplazada a la seronda por alcuerdu de l’ALLA y el Gobiernu dada la situación de crisis sanitaria pola pandemia de COVID-19. Sicasí, estos primeros díes de mayu nun pierden la parte reivindicativa de la mano de la XDLA, que recuerda que “entá nun hai normalidá” y convoca a la sociedá a sumase dende la rede.

Dende hai cuatro décades mayu ye’l momentu de la gran fiesta de la nuesa lliteratura. Xornaes nes que la llingua asturiana asoma en tolos medios de comunicación y nes que s’acumulen eventos al rodiu del idioma per toda Asturies.

La Xunta pola Defensa de la Llingua Asturiana (XDLA) pon la parte reivindicativa’l vienres de la Selmana, Día de les Lletres Asturianes, demandando la oficialidá del asturianu y gallego-asturiano como la única forma de garantizar los derechos de los falantes de dambes llingües y poner el primer pegollu que sirva pa frenar el so desaniciu. Esti mayu nun va poder convocar a la sociedá asturiana pa salir a la cai, dada la situación esceicional, pero nun quier dexar pasar la oportunidá de que’l lema ‘oficialidá’ que tolos años glayen miles de persones se sienta, anque nesta ocasión de manera virtual.

“Había que facer referencia a la Selmana de les Lletres y recordar qu’entá nun hai normalidá, porque nun la va haber mientres falten derechos”, apunta Carlos Pulgar, voceru de la XDLA. “Queremos que la xente participe mientres tola selmana y el mesmu vienres a partir de les 19 hores, cuando ta convocada la manifestación y vamos emitir un videu en redes, y que la xente d'Asturies dexe claru'l compromisu col futuru de la llingua asturiana”, añade al tiempu que llama a partíos políticos, sindicatos y asociaciones culturales y deportives a sumase a la reivindicación.

#YoTuvi

La primer iniciativa pa preparar el Día de les Lletres Asturianes va consistir na xuba a redes sociales de semeyes de la so participación n’anteriores manifestaciones pola oficialidá entamaes nesta xornada xunto coles etiquetes #YoTuvi y #SemeyaMani. D’esta forma’l coleutivu cívicu pretende que “la xente muestre'l so apoyu a lo llargo de décades a estes convocatories”.

El vienres van dir espublizándose videos de delles persones de sonadía llamando a la convocatoria, prevista pa les 19 hores. Nesi momentu la XDLA va espublizar otra pieza audiovisual que va servir d’aniciu a la manifestación virtual, que va consistir en que los ciudadanos “tuitien frases sobre la oficialidá, la llingua asturiana o la falta d'un marcu llegal afayadizu pal nuestru idioma” cola etiqueta #Oficialidá.

Amás, estos díes el coleutivu cívicu va llanzar mensaxes pa recordar que “la llingua asturiana tien que formar parte del procesu de reconstrucción social y económicu que se ponga en marcha desque acabe la crisis sanitaria y l'estáu d'alarma”.

Na semeya, un momentu de la manifestación de la XDLA pol Día de les Lletres Asturianes del añu pasáu.