"La Fiesta de la Oficialidá ye una reivindicación de llibertá", asegura Barbón

"Frente a los discursos catastrofistes, Bimenes amosó que se pue convivir con esa total lliberta", añade'l primer presidente n'acudir a la celebración nos 25 años de conmemoración.

Adrián Barbón asistió un añu más a la Fiesta de la Oficialidá, a la que yá acudiera como alcalde de Llaviana y secretariu xeneral de la Federación Socialista Asturiana (FSA) en delles ocasiones, la última vegada nel 2019 –les restricciones pola pandemia obligaron a celebraciones simbóliques nel 2020 y 2021– depués de ganar les eleiciones y unos díes enantes del Plenu d'investidura, nesta ocasión ya como presidente oficialmente. "Quixera poner en valor, depués de tantos años celebrando y reivindicando como se fai en Bimenes, qu'esto nun dexa de ser un glayíu de llibertá. Esta fiesta nun dexa de ser una reivindicación de llibertá, de la llibertá de cáun d'utilizar la llingua que quiera, la que prefiera. Equí hai un respetu absolutu de siempre, y debería ser estensivu a Asturies, a la utilización de les llingües propies, la llingua asturiana y la fala eonaviega, y el castellanu como llingua oficial del Estáu", afirmó en Martimporra. 

El llavianés insistió con esa idea de llibertá, "porque frente a los discursos catastrofistes qu'ataquen a los derechos de la xente, Bimenes siempre amosó qu'esto ye un glayíu de llibertá, un glayíu de llibertá pa usar la llingua qu'ún prefiera y pa convivir con esa total llibertá". Sobre la oficialidá, yá retrasada a la llexislatura siguiente al nun haber alcuerdu pa los 27 votos, afirmó que "dependerá de los ciudadanos col so votu".

Na imaxe, Barbón esti sábadu xunto con Antón García, direutor xeneral de Política Llingüística. Semeya obra d'Armando Álvarez.