“Creamos la Oficina de Derechos Llingüísticos p’atender les cuestiones que puedan surdir cuando se quier vivir n’asturianu”, anuncia Piñán

La conseyera de Cultura, Política Llingüística y Turismu, Berta Piñán, aprovechó la so presencia en Bimenes pa participar na Fiesta de la Oficialidá cola llectura del pregón nel 25 aniversariu de la declaración del 1997 p’anunciar la creación de la Oficina de Derechos Llingüísticos. Ensin calter sancionador, pretende garantizar los derechos qu’afita la Llei d’Usu y asesorar a la ciudadanía énte les sos duldes.

“Ye dalgo no que veníemos trabayando nello dende hai tiempu y queríemos crear esi órganu dientro de la conseyería p’atender toes eses reivindicaciones, eses cuestiones que pueden surdir nel día a día de la ciudadanía cuando quier vivir n’asturianu siempre nel ámbitu del marcu llegal que la Llei d’Usu nos propón”, esplicó en Martimporrra. “Creo que ye un pasu más, d’esos pasinos que vamos dando, pero que van creando un conxuntu de midíes dende esti Gobiernu y dende esta conseyería a favor de la llingua asturiana, de la so preservación, de la so conservación y de la so proyeición hacia’l futuru”, añadió.

Darréu punxo como exemplu de les cuestiones a tratar pola Oficina de Derechos Llingüísticos les duldes sobre cómo presentar una tesis n’asturianu o d’hasta qué puntu ampara la Llei d’Usu y Promoción del Bable/Asturianu. En definitiva, “atender toes estes coses nes que la ciudadanía nun sabe ónde acudir” y “estirar la Llei d’Usu hasta les llindes que tien, que munches veces tien más de les que creemos”.

El procedimientu pa l’aprobación del decretu que va regular la creación y funcionamientu del órganu nuevu, que ta incluyíu nel Plan Normativu de l’Alministración del Principáu d’Asturies pal 2022, yá ta abiertu. Ésti va contar con personal cualificao de la Direición Xeneral de Política Llingüística con conocimientu abondo de llingua asturiana y de la normativa reguladora d’esta materia p’asina dar calce y respuesta apropiaos a les solicitúes recibíes garantizando la proteición de los derechos qu’establez la normativa vixente.

Con calter añal, la Oficina, que nun va tener calter sancionador, va ellaborar una memoria que contenga’l númberu y la naturaleza de les quexes, suxerencies y solicitúes d’información o d’asesoramientu recibíos, y les actuaciones feches pa caún de los casos.

“Fiesta de la llibertá”

Momentos enantes de xubir a lleer el pregón, Piñán refirióse a la Fiesta de la Oficialidá como una “fiesta de la llibertá, de la reivindicación de los derechos, y una fiesta de la resistencia”. “Yo sigo creyendo nel futuru de la llingua asturiana y el futuru de la oficialidá ta cerca”, siguió la conseyera, primera con esti cargu en participar como pregonera.

“Ye un allegría y un honor”, aseguró, “amás nun añu como ésti, nel que se cumplen 25 de la proclamación de la oficialidá nesti conceyu”.

Na imaxe, Piñán, tercera pela derecha, conversa col presidente Adrián Barbón y el direutor xeneral de Política Llingüística, Antón García, col alcalde Aitor García Corte, a la so derecha con traxe tradicional asturianu. Semeya obra d'Armando Álvarez.