Nueve alcaldes acudieron a Bimenes pa participar na Fiesta de la Oficialidá

A ellos hai que sumar la representación de la Cámara Municipal de Miranda de l Douro y l'asistencia del presidente Barbón, la conseyera Piñán y diputaos de la FSA y Podemos.

La XXVI Fiesta de la Oficialidá celebrada'l sábadu en Bimenes, que conmemoraba los 25 años de la declaración del 1997, contó con una amplia representación institucional. Un total de 9 alcaldes respondieron a la invitación del Conceyu y acudieron a Martimporra al actu institucional.

Foron los socialistes de Nava, Juan Cañal; Colunga, Sandra Cuesta; Cabranes, Gerardo Fabián; Villaviciosa, Alejandro Vega; y Samartín del Rei Aurelio, José Ángel Álvarez 'Quirós'. De Foro desplazóse'l d'El Valle Altu de Peñamellera, José Antonio Roque, y el d'Izquierda Xunida'l de Morcín, Maximino García Suárez, mentes que tamién tuvieron en Bimenes Saúl Bastián, primer edil de Sariegu por Progreso Municipal de Sariego (PROMUSA), y Amparo Antuña, de Noreña por Independientes por Noreña.

La representación institucional completóse colos yá anunciaos Adrián Barbón y Berta Piñán, responsable de Cultura, Política Llingüística y Turismu que foi la encargada de lleer el pregón, y finalmente del vicepresidente de la Cámara Municipal de Miranda de l Douro, Nuno Rodrigues, en sustitución de la presidenta nueva Helena Barril. Tampoco nun se quixeron perder esti importante acontecimientu les diputaes socialistes Mónica Ronderos, Noelia Macías y Esther Fraile, y la de Podemos, Nuria Rodríguez López.

Na semeya, les autoridaes, al fondu, presencien la Danza de la Oficialidá.