El presidente Barbón va acudir a la Fiesta de la Oficialidá de Bimenes

Esti sábadu celebráse esta folixa que conmemora la declaración d'oficialidá del 1997, de la que se cumplen 25 años.

Adrián Barbón va acudir un añu más a la Fiesta de la Oficialidá de Bimenes, la primera oficialmente como presidente del país –nel 2019 entovía nun tomara posesión del cargu anque yá ganara les eleiciones– llueu de dos años d'una celebración reducida poles restricciones por mor de la situación sanitaria. Asina lo confirma l'axenda del presidente, que va tar presente nel actu institucional del meudía de mañana na plaza de Miranda de l Douro, en Martimporra, al igual qu'Antón García, direutor xeneral de Política Llingüística.

Nel mesmu la conseyera de Cultura, Política Llingüística y Turismu, Berta Piñán, va lleer el pregón de la fiesta nun añu mui significativu, yá que se cumplen 25 de la declaración d'oficialidá del 1997. Tamién van intervenir l'alcalde Aitor García Corte y Helena Barril, presidenta nueva de la Cámara Municipal de Miranda de l Douro, territoriu portugués hermanáu con Bimenes onde ta reconocíu'l mirandés, del tueru asturlleonés.

A les 12.30 hores va entamase la Danza de la Oficialidá y un pasucais del Grupu Folklóricu Los Yerbatos y los mirandeses Pauliteiros pa desplazase a la plaza del polideportivu Melanio Asensio de Santuyano, onde va celebrase a les 14.30 hores la Xira Popular. Toles persones que quieran participar pueden llevar la xinta de casa, non asina la bébora, polo que s’habilita un serviciu de bar.

Los Gascones van ambientar la tarde, cuando se va celebrar a les 17 hores el VII Concursu d’Escanciadores de Bimenes. Pa zarrar, a les 23 hores van tener llugar los conciertos, con Figos de Tuna y Dixebra, banda que ta presentando pel país el so discu-llibru ‘Ente la niebla’.

Nueche en Danza

Estos díes Bimenes tuvo celebrando la Selmana Cultural pola Oficialidá, col entamu d'una actividá diaria que se culmina mañana col día grande. Esta nueche ye'l turnu del 'Bimenes en danza', tamién en Santuyano, que va principiar a les 21 hores con un taller de baille a cargu de Montse Rico pa siguir coles actuaciones a les 22.30 hores de Los Yerbatos, Cantaruxare y Pandereteres de Fitoria.

Na semeya, Barbón, segundu pela izquierda ente Cotiello y el primer edil de Cabranes, posa en Martimporra con delles persones, ente ellos l'alcalde de Bimenes, García Corte, vistíu col traxe'l país, na XXIII Fiesta de la Oficialidá, la del 2019, última celebrada con normalidá.