La conferencia del rector n'asturianu, la meyor noticia del 2018

|
Día Ciencia: García Granda y Fernando Padilla (08/11/18)

Los usuarios que participaron na consulta d'Iniciativa pol Asturianu pa escoyer la ‘Meyor noticia pal asturianu en 2018’ votaron pola ponencia de García Granda nel Arqueolóxicu.

Foi'l pasáu 8 de payares nel marcu del VIII Día de les Ciencies Asturianes, llevaba'l nome de 'Notes sobre la investigación na Universidá d’Uviéu' y yera la primer vegada qu'un rector de la institución universitaria asturiana ponía una conferencia nel que s'emplegara únicamente la llingua asturiana. Un fechu históricu que los participantes nesta encuesta que dende hai cinco años entama la organización que trabaya pola normalización del idioma escoyeron como la noticia más relevante pal asturianu del 2018 ente 37 opciones.

En segundu llugar, y con poca diferencia de votos con respeuto a la protagonizada por Santiago García Granda, queda la manifestación del 21 d’abril, convocada pola XDLA baxo'l nome de ‘L’asturianu llingua oficial ¡yá!’, qu'axuntó a cerca de 30.000 persones n'Uviéu ’. Mentes, la siguiente de la llista foi'l resultáu del estudiu ‘Los jóvenes y la lengua asturiana’, encargáu pol Conseyu de la Mocedá del Principáu d'Asturies y ellaboráu por Isabel Hevia, que reflexa que'l 86,1 por cientu de los mozos d'Asturies apoya la demanda de la oficialidá, ente otros munchos datos interesantes.

“Dende Iniciativa pol Asturianu celebramos la participación de los y les internautes nesta encuesta. Cuando termina l’añu y facemos la escoyeta de noticies pa esta encuesta, dámonos cuenta de que cada añu que pasa hai más noticies positives alrrodiu l’asturianu y tamién más participantes, más de 300 persones nel sondéu, lo qu’amuesa que esti idioma interesa a la xente”, espresa Inaciu Galán, presidente de la organización.

Asturies.com, diariu dixital comprometíu pa col idioma dende la so nacencia nel 1997, nun dexó de cubrir tanto éstes como toles noticies más relevantes pa la llingua asturiana nesti pasáu 2018. Asina informamos de les trés más relevantes pa los participantes na encuesta ‘Meyor noticia pal asturianu en 2018’:

  1. "Tien que se facer ciencia p'ameyorar el futuru', afirma García Granda
  2. Asturies faló: "¡Oficialidá!"
  3. El 86,1 por cientu de los mozos asturianos apoya la demanda d'oficialidá
     
Contador Estadistiques