Iniciativa pol Asturianu busca la 'Meyor noticia pal asturianu en 2019'

Llama a la ciudadanía a votar pa escoyer el fechu más relevante pal idioma l'añu pasáu.

Dende'l 2013 Iniciativa pol Asturianu vien entamando una campaña pela rede pa ver qué noticia foi la meyor pal asturianu. Asina pretende "facer llegar a los asturianos y a les asturianes delles bones noticies pal nuesu idioma", amás de recoyer lo positivo "pal asturianu y treslladar que la llingua asturiana va ganando presencia nes instituciones y normalidá na sociedá", esplica Iván Llera, presidente de la organización.

Si nel 2018 la conferencia n'asturianu puesta pol rector de la Universidá d'Uviéu, Santiago García Granda, foi lo más positivo pa los participantes na campaña, agora la xente interesao tien la oportunidá d'escoyer la del 2019 ente 18 propuestes, con un máximu de 8 votos per persona. El plazu pa participar na 'Meyor noticia pal asturianu en 2019' empezó güei y va allargase hasta'l domingu 12.

"Cada añu que pasa va medrando’l númberu de participantes y la cantidá de noticies positives pal idioma", destaca Llera, que considera qu'esta campaña "tamién val pa facer un repás a tola llabor d’Iniciativa pol Asturianu y pa comprobar como añu a añu la llingua asturiana tien una repercusión postiva nos medios".