"Tien que se facer ciencia p'ameyorar el futuru", afirma García Granda

El rector protagonizó una conferencia histórica en llingua asturiana con motivu del VIII Día de les Ciencies Asturianes.

Acompañáu del direutor del Muséu Arqueolóxicu, Ignacio Alonso, y del direutor xeneral de Planificación Llingüística y Normalización, Fernando Padilla, Santiago García Granda, punxo la ponencia 'Notes sobre la investigación na Universidá d’Uviéu' nel salón d'actos del recintu mueísticu. Una intervención especial por ser la primera conferencia na qu'un rector de la Universidá d'Uviéu emplega únicamente l'asturianu.

"Tien que se facer ciencia p'ameyorar el futuru", aseguró García Granda, qu'añadió que la investigación científica "fai a la sociedá más llibre, más sana y más intelixente". "La sociedá tien que reconocer al investigador como un 'héroe'", continuó'l rector.

Na intervención detalló'l puxu investigador de la Universidá d'Uviéu, "al mesmu nivel qu'otres del nuesu tamañu", y espuso los oxetivos nesti campu de la institución, como l'ampliación del númberu de científicos, una mayor collaboración col mundu empresarial o una mayor retención del talentu nel país. "Ta faciéndose muncho, pero queda muncho por facer", aseguró.

Llingua asturiana

No que respeuta a la presencia del asturianu na Universidá d'Uviéu destacó que los sos estatutos afita que "la llingua asturiana sedrá oxetu d'estudiu, enseñanza ya investigación nos ámbitos que correspuendan". Mentes, citó que'l reglamentu del usu del idioma na institución "regula la presentación d'escritos, comunicaciones y solicitúes redactaos en llingua asturiana na institución. La unidá alministrativa responsable de la tramitación de los documentos presentaos n'asturianu asume la tarea d'incorporar al espediente la traducción, solicitando la collaboración de la Unidá de Traducción de l'Alministración del Principáu o del órganu universitariu que s'ocupe d'ello".

La Comisión Asesora de Normalización Llingüística ye la última iniciativa puesta en marcha pola institución p'avanzar na presencia y usu del idioma na Universidá d'Uviéu, cola función de proponer actuaciones, desarrollales y puxa por elles. La conferencia siguió con una esplicación sobre'l llabor investigador y de sofitu de la universidá pa col idioma, como ye'el Seminariu de Filoloxía Asturiana o los alcuerdos cola Academia de la Llingua Asturiana, cola presencia de les sos espublizaciones na plataforma Reunido o la collaboración na Universidá Asturiana de Branu (UABRA).

Tamién pa escolinos

Esta mañana tuvo llugar na Casa Cultura de La Pola Llaviana la segunda actividá del VIII Día de les Ciencies Asturianes. El científicu Amador Menéndez Velázquez punxo la charra 'Tecnoloxía al serviciu de la humanidá', na que presentó a un grupu d'escolines y escolinos les posibilidaes qu'ufierta la teunoloxía a la hora d'encarar dalgunos de los retos más importantes de la sociedá actual.

Semeya: Fernando Padilla (direutor xeneral de Planificación Llingüística y Normalización) y Santiago García Granda (rector de la Universidá d'Uviéu).