El 86,1 por cientu de los mozos asturianos apoya la demanda de la oficialidá

“Son datos mui importantes porque la mocedá ye’l futuru; reflexen que la llingua asturiana tien futuru”, destacó Isabel Hevia tres presentar l’avance de resultaos del estudiu ‘Los jóvenes y la lengua asturiana’ encargáu pol CMPA. El 86,1 por cientu ta a favor de la oficialidá, pol 53 de la encuesta de Francisco José Llera Ramo.

Hevia tuvo acompañada na presentación por Álvaro Grande, presidente del Conseyu de la Mocedá del Principáu d’Asturies (CMPA), y por Xosé Antón González Riaño, presidente de l’Academia de la Llingua Asturiana. La direutora del estudiu encargóse de resumir datos del mesmu, que tenía como oxetu “conocer la oponión de la mocedá sobre la llingua asturiana y el so usu”.

Ésti ellaboróse nel mes de setiembre al traviés de 416 encuestes feches “a pie de cai y de manera aleatoria” a xóvenes d’ente 16 y 29 años en 53 conceyos del país, distribuyíos en función de la proporcionalidá de la población. El 51,4 por cientu son homes y el 48.6 por cientu, muyeres, de los que’l 49,8 por cientu dieron clase de Llingua Asturiana na escuela.

El trabayu divídese en trés estayes: Identidá Llingüística, Usos de la Llingua Asturiana y Demandes Llingüístiques. Ente los datos principales del avance hai que destacar que’l 93 por cientu considera l’asturianu como una llingua al mesmu nivel que’l restu de les oficiales nel Estáu, cifra tamién mui superior a la reflexada pola III Encuesta Sociollingüística d’Asturies (2017), que rexistró un 53 por cientu.

Un 42,5 por cientu usa les dos llingües nes sos interaiciones sociales, por un 49,5 por cientu que diz emplegar namái’l castellanu y un 7,8 por cientu l’asturianu, y no que respeuta’l so conocimientu, los datos espresen un mayor dominiu oral ente la mocedá con respeuto a la población xeneral, y menor nel casu de la escritura y llectura. El 83,5 por cientu asegura que nunca sintió discriminación por usar l’idioma, dándose los casos más frecuentes n’ámbitos formales, principalmente académicos, o por cuenta de bromes por mor del acentu.

Los hábitos llectores y d’escritura son mayoritariamente en castellanu, 78,4 y 62 por cientu, de manera respeutiva, anque nel casu de les nueves teunoloxíes y redes sociales el 33,9 por cientu diz usar les dos llingües indistintamente. Los mozos consideren que l’asturianu ye una llingua útil tanto pal ámbitu familiar como social.

Apoyu casi unánime a la presencia nel enseñu

El 82 por cientu de los encuestaos ta a favor de que la llingua asturiana tenga presencia nel enseñu y un 77,2 por cientu cree que debería ser emplegada tamién como llingua vehicular. En comparanza col estudiu de Llera Ramo, baxa’l porcentaxe de los que quieren que l’asturianu tea nes escueles (91 por cientu), cola matización de qu’esa cantidá incluyía la voluntariedá, anque aumenta los que quieren que sía llingua d’instrucción (52 por cientu).

No que respeuta a la RTPA, el 80 por cientu demanda una mayor presencia del asturianu, y el 82 por cientu que los programes na llingua llariega abarquen temátiques más amplies, como deportes, informativos y dibuxos animaos. Por último, un 86,1 por cientu apoya la oficialidá del asturianu por un 12,2 por cientu en contra, tando mui d’alcuerdu un 57,5 por cientu y nada d’alcuerdu un 5 por cientu.

Esta cifra ye mui superior a la de la encuesta fecha  por Llera Ramo a la población xeneral, que s’asitiaba nun 53 por cientu. Un 25 por cientu declarábase nella contrariu a la oficialidá y un 20 por cientu indiferente, cantidá ésta última que nel casu de la mocedá queda nun residual 1,7 por cientu.

“La mocedá asturiano constitúi un factor de dinamización, de xustificación y hasta d’esixencia d’una política de normalización y recuperación llingüística n’Asturies”, concluyó la pedagoga, socióloga y académica, que tamién destacó que los datos del estudiu “son coherentes colos positivos resultaos” del estudiu de Llera Ramo, “anque podríemos destacar qu’ente la xuventú les posiciones son muncho más favoratibles al usu y caltenimientu del asturianu”. Tamién calcó na esistencia “d’una menor influencia de la diglosia tradicional” ente la xente mozo y “una inéquivoca posición afeutiva con respeuto al asturianu y les sos posibilidaes de dignificación y recuperación”.

Na semeya, González Riaño, Granda y Hevia, mientres un momentu de la presentación celebrada na sede de l'ALLA.